O patrón do 'Vila de Pitanxo' declarará como investigado perante a Audiencia Nacional

O patrón do Vila de Pitanxo, Juan Padín, declarará o próximo 31 de maio en Madrid ante o Xulgado de Instrución número 2 da Audiencia Nacional, logo de que este tribunal dese por persoados na causa varios dos familiares das vítimas do naufraxio.

Segundo confirmaron a Europa Press fontes xurídicas, Padín será o único dos tres sobreviventes que declarará como investigado na causa, mentres que o seu sobriño, Eduardo Rial, e o mariñeiro Samuel Kwesi farano como testemuñas ese mesmo día a partir das 11 horas.

Desta maneira, a pesar de que a Audiencia aínda non se declarou competente para investigar o caso do afundimento do pesqueiro galego, ocorrido o pasado 15 de febreiro a 450 quilómetros ao leste de Terranova (Canadá), deu un paso máis nas dilixencias da causa.

Así, notificóuselles a varias familias dos falecidos que foron aceptadas como persoadas no caso, mentres que á armadora do buque, Grupo Nores, e á compañía aseguradora do mesmo solicitóuselles máis documentación para que especifiquen as razóns polas que son vítimas e non responsábeis subsidiarios do naufraxio, polo que non foron persoados.

As mesmas fontes destacaron que, malia que a Audiencia Nacional non asumiu a obriga de tramitar a causa, si lle compete comezar as dilixencias debido a que ten coñecemento da mesma, sobre todo as urxentes.

Máis tarde xa se levarán a cabo os trámites para decidir cal é o xulgado competente, e previsibelmente será o Tribunal Supremo quen o sinale.

A pesar de estar persoados, os avogados das familias aínda non teñen acceso aos expedientes do caso, polo que pediron copia dos mesmos para preparar as declaracións. Aliás, solicitarán a posibilidade de intervir por videoconferencia para evitar desprazarse a Madrid.