Nova noite de colectores incendiados na Coruña
O caos na Coruña pola folga do servizo de recollida de lixo e a falta de acordo co Concello continúa provocando incidentes. Os Bombeiros da Coruña tiveron que intervir de novo durante as últimas horas da noite desta quinta feira, 5 de xullo, para extinguir varios colectores que arderon en diferentes rúas da cidade.
Os feitos producíronse no medio da folga convocada polo Sindicato de Traballadores da Limpeza (STL), que se iniciou o pasado 24 de xuño con motivo de "despedimentos inxustificados", "externalización de servizos" e "incumprimentos" do convenio.
En concreto, ás 23.32 os bombeiros desprazáronse á rúa San Diego, onde foron advertidos do incendio dun colector de lixo que non afectaba a vehículos estacionados.
Cinco minutos máis tarde, os efectivos de emerxencias acudiron á rúa Cabaleiros a apagar un incendio nun colector grande que se atopaba xunto a outro catro que lograron separar. Para a extinción, empregaron un vehículo de mando e unha autobomba.
A partir das 00 horas e até pasadas as 03 horas sucedéronse as incidencias nas rúas Falperra, Inés Castro, Rafael Alberti, Eladio Rodríguez González, Santa Lucía, Avenida de Oza, Praza Luís Seoane, rúa Rianxo ou Sinforiano López.
En todos eles non se viron afectados vehículos nin edificios que estivesen nas proximidades dos colectores, agás na rúa Rianxo, onde o lume en dous colectores danou a dous turismos.