Unha multitude bótase á rúa contra a permanencia de Ence na ría de Pontevedra
A dupla manifestación que partiu das alamedas de Pontevedra e de Marín para confluíren diante da factoría de Ence, en Lourizán, contou coa participación dunha multitude de persoas que clamaron o feche da pasteira. VÍDEO NO INTERIOR.
Pasaban as 20h cando as dúas marchas partían das alamedas de Pontevedra e de Marín convocadas pola Plataforma Ence Fóra da Ría como cada mes de xuño. Porén, a deste ano foi a mobilización máis numerosa das que teñen lugar todos os xuños após aprobar o Goberno do PP no mes de xaneiro, xa en funcións, a concesión da prórroga a Ence para que poida seguir a desenvolver a súa actividade durante 60 anos na actual localización, ao pé da ría.
Nas manifestacións puideron oírse os propios lemas que convocaban os protestos: “Ence fóra da ría para sempre”, “Saneamento integral da ría” e “Non, non, non á eucaliptización”. O escritor Calros Solla foi o encargado de ler o manifesto, no que se apelou á necesidade de que a ría “sexa devolta íntegra á cidadanía, aos seus verdadeiros e lexítimos posuidores”. Na mesma liña, criticou as persoas que “vitorean” a “demostración de poderío” de Ence mentres a pasteira “incuba ovos pobres coa negra fumareda da usura e o latrocinio”.
Entre as persoas que participaron da mobilización atopábanse as que foran deputadas de Podemos-En Marea Alexandra Fernández e Alejandra Rodríguez; a parlamentar do PSdeG Patricia Vilán ou o cabeza de lista do BNG-Nós por Pontevedra, Luís Bará, acompañado dunha nutrida representación do Bloque, entre a que destacaba a portavoz nacional, Ana Pontón. Aliás, estaban representadas organizacións como Adega, Erguer ou Galiza Nova.