Un mozo en estado grave tras ser apuñalado e recibir varios disparos en Ribeira
Unha persoa de 27 anos foi apuñalada e baleada está noite en Ribeira. O mozo atópase ingresado en estado grave no CHUS.
As rúas de Ribeira foron escenario dun novo episodio de violencia na noite de hoxe. Neste caso, a vítima foi un mozo agredido nas proximidades do Malecón desta vila do Barbanza.
Os feitos aconteceron pasadas as tres da madrugada. Nese momento, comezou unha pelexa entre a vítima e os seus atacantes, que provocou noutro lugar próximo o desenlace final.
As primeiras novas sobre o tiroteo chegaron as 3:20, cando un veciño da rúa Diego Delicado se puxo en contacto co 112 para informar de varios disparos nesta céntrica rúa de Ribeira.
Tiroteo en Ribeira
O aviso alertou as forzas da orde, que se desprazaron ao lugar dos feitos e atoparon ao mozo con varias feridas graves provocadas por armas brancas e de fogo. A esta hora, continúa o dispositivo policial para dar cos autores da agresión.
O mozo foi trasladado inmediatamente nunha ambulancia asistencial de soporte vital atendida por persoal sanitario do PAC de Ribeira ao hospital comarcal do Barbanza, onde foi sometido a revisión.
A gravidade das feridas provocou o seu desprazamento ao Complexo Hospitalario Universitario de Santiago de Compostela (CHUS) por contar con máis medios para facer fronte a esta situación.
‘Entre a vida e a morte’
Nós Diario púxose en contacto con testemuñas presenciais dos feitos, que indicaron que o mozo “debatíase entre a vida e a morte” cando foi trasladado ao complexo hospitalario barbancés tras recibir a primeira asistencia na rúa.
As primeiras novas destacan que a vítima presentaba un orificio de bala no tórax e unha coitelada na mesma zona. A esta altura os responsábeis médicos non emitiron ningunha información oficial sobre o estado real do mozo.