Morre unha moza de 24 anos en UCI desde agosto por coronavirus e outras "graves patoloxías"
Unha moza ourensá de 24 anos de idade diagnosticada coa Covid-19 e con outras "graves patoloxías" morreu na tarde-noite da quinta feira nun hospital de Vigo, pero como negativizara días antes de falecer a Consellaría de Sanidade non a inclúe entre as vítimas da pandemia naGaliza.
Segundo confirmaron fontes sanitarias, a moza diagnosticada con Covid morreu na tarde-noite deste 30 de setembro na Unidade de Coidados Intensivos do Hospital Álvaro Cunqueiro de Vigo, na que permanecía desde o pasado mes de agosto.
Esta paciente fora trasladada o pasado mes de agosto desde o Complexo Hospitalario Universitario de Ourense ao hospital vigués. Fontes da Consellaría de Sanidade puntualizaron que a moza negativizara hai tempo.
As mesmas fontes de Sanidade indicaron que a muller, que fora derivada desde o Complexo Hospitalario de Ourense, "presentaba graves patoloxías xa no momento do seu ingreso".
Ademais, ratificaron que no transcurso da súa estancia na UCI a paciente dera negativo da Covid-19, polo que Sanidade non a conta entre as vítimas Covid. De incluíla sería a máis nova até a data.
Até o momento faleceron 2.638 persoas diagnosticadas con Covid-19 na Galiza desde o inicio desta pandemia, xa que a morte desta paciente non se inclúe nos rexistros.
A última vítima mortal coa Covid da que informou Sanidade foi un home de 93 anos que se atopaba hospitalizado no Complexo Hospitalario Universitario de Santiago e tiña patoloxías previas.