Moeche convértese por terceiro ano na capital do queixo
A Feira do Queixo de Moeche abre a súa terceira edición con queixos de Galiza, Asturias, O Bierzo, León e Estremadura pero tamén con especialidades belgas, francesas, suízas e italianas. A feira acollerá a 22 queixerías
A III Feira do Queixo de Moeche acollerá este domingo na nave do mercado a 22 queixerías de dentro e fóra de Galiza. A mostra ofrecerá queixos de Galiza, Asturias, O Bierzo, León e Estremadura, pero tamén especialidades belgas, francesas, suízas e italianas.
A terceira edición da Feira do Queixo de Moeche dará comezo ás 10:00 horas, cunha mañá repartida en tres catas. Ás 11:00 horas será a quenda dos queixos asturianos. Máis tarde, Chill & Cheese animarán a sesión vermú, que comezará ás 12:00 horas coincidindo coa derradeira cata de queixos, desta vez de orixes leonesa e estremeña. A rolda de catas finalizará as 13:00 horas cos queixos galegos de Cortes de Muar e Touza Vella, ambos premiados nos “World Cheese Adwards”.
A xornada continuará até as 19:00 horas, cunha programación pensada para todas as idades. Amais das catas, están organizados obradoiros infantís ao longo de toda a mañá, e, ás 16:00 horas, os máis novos poderán aprender a facer queixos da man da Gandería Lavandeira, para despois desfrutar do Mago Romarís co seu espectáculo “O mellor mago do mundo”.