Os millóns chegan cedo a Vigo tras coincidir o segundo premio co número que xoga Bimba y Lola

O número 70.048, o que resultou agraciado co segundo premio do Sorteo Extraordinario de Lotaría de Nadal, dotado con 1.250.000 euros á serie, é o que xogaba a empresa Bimba y Lola, con sede en Vigo. O número foi cantado ás 9.21 horas no sexto arame da primeira táboa.

Os premios do Sorteo Extraordinario de Nadal 2025 comezaranse a abonar desde a tarde do 22 de decembro, cando finalicen tanto as verificacións dos números extraídos como os procesos informáticos, como é habitual, e até o 23 de marzo de 2026.

Se os premios son inferiores a 2.000 euros por cada décimo ou resgardo, pódense cobrar exclusivamente nun dos 10.869 puntos de venda da rede comercial de Lotarías, a partir da tarde do 22 de decembro.

Neste caso, o premio pode cobrarse en metálico ou a través de Bizum. Os premios dun importe igual ou superior a 2.000 euros cobraranse nas entidades financeiras autorizadas, que son BBVA e Caixabank.