"Lugares Puntuais" sen asistencia sanitaria na Galiza

"A mentira ten as patas moi curtas por iso a verdade sempre a alcanza". Dito popular. O 29 de xuño do 2025, o incompetente e malfalado Conselleiro de Sanidade, negou que haxa un "colapso" no Servizo Galego de Saúde durante o verán, aínda que si recoñeceu que "pode haber momentos de maior tensión, porque non hai xente para contratar". Manifestou: "Os lugares onde temos problemas sanitarios son puntuais". E díxoo sen anestesia! Xunto co irresponsable Sr. Rueda, pon de manifesto que para eles os recortes feitos na sanidade pública galega, manteñen a asistencia sanitaria sempre garantida e pasa o que pasa: porque non temos médicos. Vemos que a argumentación é falaz, pois se miramos a oferta MIR en España, en 2025, (a maior ata o de agora) sempre se presentan máis profesionais que prazas ofertadas. E das convocadas na Galiza, preséntanse máis médicos que prazas se ofertan, e moitas quedan desertas. O propio sistema deixa fóra moitos médicos e médicas… A pregunta é: por que sucede? Salarios baixos, precariedade, gardas abusivas, mala administración por parte do PP das prazas existentes. Un país mobilizado Para demostrar que NON son "casos puntuais" detallarei algúns dos lugares nos que no verán 2025 se fixeron mobilizacións. —A Coruña: a Comisión de Centro do CHUAC denunciou que o Sergas pechou este verán 230 camas. A Plataforma SOS Sanidade Pública de Compostela fixo unha rolda de prensa para denunciar o peche de 111 camas no CHUS e convocou unha concentración diante do Centro de Saúde Concepción Arenal (Santiago de Compostela). Falta de persoal no PAC de Ponteceso. En Ribeira, a Plataforma en Defensa da Sanidade Pública da Comarca da Barbanza realizou este xoves unha nova concentración. Indican que a presión asistencial incrementouse, mentres o número de profesionais diminúe. —Lugo: en Cervo faltan de médicos. Mobilizacións en Viveiro contra os recortes sanitarios. A Plataforma na Defensa da Sanidade Pública da Mariña denunciou que faltan cinco médicos de familia dos 11 que son. No Vicedo reclaman unha "sanidade pública e de calidade". En Folgoso do Courel (Courel Vivo) denuncia a falta de asistencia médica. En Vilalba e A Pontenova saíron a rúa para reclamar "unha atención sanitaria decente". —Ourense: Arrolos de Teta, O parto é noso, Marcha Mundial das Mulleres, Petra Maternidades Feministas, a Asociación Galega de Matronas e a Plataforma SOS Sanidade Pública de Ourense manifestáronse para pedir a paralización inmediata do traslado do paritorio de Ourense. Ademais, SOS Sanidade convoca unha mobilización cidadá para exixir solucións urxentes e denunciar a falta de transparencia na xestión sanitaria e anuncia mobilizacións polo peche de camas, centros de saúde e consultas. O Hospital de Ourense ten unhas listas de agarda inaceptables con máis de 80 días para unha cirurxía. Mobilizacións no Barco, contra os recortes sanitarios. Concentración en defensa da sanidade pública diante do Hospital de Valdeorras. —Pontevedra: o Hospital Montecelo ten listas de agarda en especialistas, camas pechadas, urxencias saturadas, etc. A Plataforma pola Defensa da Sanidade Pública retoma as protestas en Redondela e Chapela. No centro de saúde de Seixo-Marín faltan médicos. Tres meses de concentracións no centro médico de Catoira, cada mércores. Falta de médicas, pediatría e leváronlle a Ambulancia Medicalizada para Sanxenxo. Protestas da Plataforma de Cerdedo-Cotobade pola Sanidade Pública. Na comarca do Salnés, os centros de saúde funcionan en moitos casos sen pediatras nin reforzos de persoal. Protestas no Centro de Saúde Pintor Colmeiro (Vigo). A Plataforma SOS Sanidade Pública de Vigo denuncia que a Xunta do PP, fechará 174 camas no verán: 140 no Hospital Álvaro Cunqueiro e 30 no Hospital do Meixoeiro. O Sergas vai suprimir a praza de Traballadora Social da Unidade de Saúde Mental de Tui. No Hío (Cangas) levan máis dun ano, cada 15 días, manifestándose para que volva o médico e pola construción do novo centro de saúde na localidade. Protestas na Caniza, Valeixe, Crecente, Covelo, Mondariz e Mondariz Balneario. En Moaña, levan 125 concentracións os domingos ante a Casa do Mar. Concentración no centro médico das Neves por falta de médicas. E non están todos os lugares! Seguiremos denunciando que queremos unha sanidade pública do primeiro mundo e que o PP non pode destruír o ben máis prezado que temos: a nosa saúde! O camiño é a loita sen tregua, ata conseguir a sanidade pública universal e de calidade que precisamos.