En liberdade provisional o policía detido en Vigo por supostos vínculos co narcotráfico

O axente da Policía Nacional detido o pasado sábado no aeroporto de Vigo e vinculado presuntamente co arresto do xefe do grupo de estupefacientes de Murcia quedou en liberdade provisional, segundo informaron fontes do Tribunal Superior de Xustiza de Murcia (TSJMU) citadas pola axencia Europa Press. O maxistrado ordenou a retirada do pasaporte do policía, ao que se lle prohibiu saír do territorio estatal, e impúxolle a obriga de comparecer periodicamente en sede xudicial.

O procedemento está aberto polos presuntos delitos de pertenza a organización criminal, contra a saúde pública, suborno, branqueo de capitais, omisión do deber de perseguir delitos e revelación de segredos.

A Unidade de Asuntos Internos detivo o pasado febreiro o xefe do grupo de estupefacientes da Xefatura Superior de Policía Nacional de Murcia no marco dunha operación dirixida polo Xulgado de Instrución número 7 da capital murciana. O arresto produciuse por axentes desprazados desde Madrid e o axente detido pasou a disposición xudicial o pasado 22 de febreiro.

O Xulgado enviou a prisión provisional tanto a este policía como a outro dos investigados dentro desta operación contra o tráfico de drogas. Ademais, deixou en liberdade os catro investigados restantes no marco da mesma causa.

Aliás, ordenou varias entradas e rexistros nos partidos xudiciais de Murcia, Molina de Segura e San Javier, no marco dun procedemento xudicial declarado secreto no que se investigan actividades relacionadas co tráfico de drogas.

Segundo se informou ao instrutor, practicáronse varias detencións na Rexión de Murcia e mais en Madrid, entre eles a do xefe do grupo de estupefacientes, practicada por axentes da Unidade de Asuntos Internos, así como a de Vigo, que estaría tamén vinculada coa investigación.