Libera denuncia un novo campionato de caza de raposo
21 de decembro de 2019 (19:59 h.)
A Asociación Animalista Libera denunciou este sábado unha convocatoria por parte da Federación Galega de Caza dun 'Campionato de caza de raposo' en varios municipios das comarcas de Noia, Barbanza e o Sar, e pediu aos concellos que non cooperen con esta actividade "tan cruel como innecesaria".
A organización tivo noticia desta competición a través dunha fotografía dun internauta a un cartel que o promocionaba, a pesar de que "o lobby pro caza ségueo tentando ocultar, xa que nin aparece no calendario de competicións da súa páxina web", denuncia.
Os animalistas avanzan que contactarán cos concellos nos que se convocou -Rianxo, Boiro, Dodro e Porto do Son- para solicitar que teñan "cooperación nula con esta actividade cruel que trata de equiparar unha práctica deportiva cunha auténtica matanza de raposos".
A asociación subliña que o anuncio indica o peche de inscricións cando se completen as 40 cuadrillas, que "contaminarán os montes con centos de perdigones de chumbo, un metal altamente contaminante".