José Eirín, culpábel de asasinato por matar co seu coche a Jéssica Méndez

O tribunal de xurado constituído na Audiencia de Pontevedra declarou culpábel de asasinato con aleivosía a José Eirín, ao considerar que o 17 de marzo de 2022 embestiu intencionadamente co seu coche o turismo de Jessica Méndez, que estaba parado nunha intersección da N-550 en Barro (comarca de Pontevedra), causándolle a morte. No veredicto reflíctese que o xurado declarou probado, por 7 votos a 2, que ese día o acusado circulaba pola N-550 e que chocou á mantenta co coche de Jessica, que estaba parado e esperando para incorporarse desde unha vía secundaria.

Con respecto á aleivosía, o tribunal popular foi unánime ao considerar probado que J.C.E.I. actuou de tal maneira que a vítima non tivo posibilidade de reaccionar nin evitar a colisión. Igualmente, foi unánime ao declarar probado que o acusado actuou motivado pola "indeferenza" que lle mostraba Jessica, unha indiferenza que proviña "dunha muller".

Todos os membros do xurado tamén estiveron de acordo en rexeitar a posibilidade de que se suspenda a execución da pena que se lle impoña, e igualmente negaron un posible indulto total ou parcial. O xurado chegou a este veredicto após 12 horas de deliberación, e o resultado foi acollido con satisfacción polos veciños de familia da vítima, que estiveron na audiencia durante todos os días que durou o xuízo e a deliberación. Este martes, de novo, increparon a J.C.E.I. á súa saída do edificio xudicial, ao berro de "asasino" e "culpábel”.

O portavoz dos veciños e a familia, Juan Tilve, expresou que os achegados están "algo máis satisfeitos" que ao comezo do xuízo, e lembrou que, o pasado domingo, en Barro os veciños celebraron un acto de recordo á moza, no segundo aniversario do sinistro. "Fíxose xustiza, quizá non a que desexabamos, pero xa está. A Jessica non nola van a devolver e el (o acusado) segue aí", afirmou.

A Fiscalía mantivo a súa petición de 24 anos de cárcere por un asasinato con aleivosía e agravado por motivos de xénero; mentres que as acusacións particulares tamén mantiveron as súas peticións, de 22 e 23 anos de prisión. A defensa, pola súa parte, negouse a pronunciarse sobre a condena, ao considerar que o veredicto de culpabilidade non está ben motivado e supón "unha inxustiza".

De feito, en declaracións aos medios, este letrado, Celestino Barros, lamentou novamente que o procesado foi sometido a un xuízo paralelo por parte dos medios e da opinión pública, e outra vez criticou a "neglixencia" da Garda Civil durante a investigación.

Na súa opinión, durante o xuízo "demostrouse" que J.C.E.I non acosaba á vítima e mantivo que o ocorrido esa mañá de marzo de 2022 foi un accidente. Aeste respecto, indicou que, en todo caso, o seu patrocinado podería ser responsábel dun homicidio imprudente, ao circular baixo os efectos do tramadol, un medicamento que estaba a tomar neses momentos.

Os feitos remóntanse á mañá do 17 de marzo de 2022, cando Jessica Méndez estaba parada co seu coche no cruzamento da N-550 coa pista que conduce á aldea de Constenla, en Barro. Pola estrada nacional circulaba o acusado que, ao ver á moza, virou o volante á dereita , saíuse do carril e a embestiu directamente na porta da condutora, causándolle un traumatismo cranioencefálico tan grave que morreu horas despois.

Esta versión foi corroborada polos expertos do Equipo de Reconstrución de Accidentes de Tráfico da Garda Civil, que confirmaron que o acusado non só virou á mantenta para chocar, senón que non freou o seu vehículo en ningún momento. As acusacións mantiveron que a manobra foi feita de forma voluntaria e consciente, porque J.C.E.I levaba anos acosando e vixiando a moza, e actuou resentido porque ela non lle correspondía nos seus sentimentos afectivos.

A defensa mantivo que o ocorrido foi "un tráxico accidente", e negou que existise ese acoso, argumentando que non nin chamadas nin mensaxes entre o acusado e a vítima nos últimos anos, e tampouco J.C.E.I. foi captado nunca pola cámara instalada na leira familiar de Jessica (por mor de que varias veces o seu coche aparecese coas rodas picadas).