O Issga recibe a urxente encomenda de elaborar un protocolo "que salve vidas" no SAF

A sede da Federación Galega de Municipios de Provincias (Fegamp) en Compostela acolleu hoxe a primeira reunión convocada pola Fegamp, a petición dos sindicatos, para acordar un protocolo de seguridade para as traballadoras do Servizo de Axuda no Fogar (SAF) da Galiza. Representantes sindicais, da Delegación do Goberno español na Galiza, do Goberno Galego, da patronal do sector, do Colexio Oficial de Traballo Social de Galicia e da propia Fegamp negocian desde hoxe este novo protocolo, unha demanda urxente que xurdiu tras o asasinato o pasado 29 de xullo de Teresa de Jesús, traballadora do SAF, nun domicilio no que prestaba servizo no Porriño (comarca de Vigo) a mans do marido –en prisión provisional, nun módulo terapéutico, desde a pasada semana– dunha das usuarias. Persoas asistentes á reunión valoraron positivamente o “diagnóstico unánime” compartido por todas as partes e acordaron refundir todas as propostas nun único protocolo para os 313 concellos do país; un protocolo que cualifican como “urxente” e co obxectivo de “salvar vidas”. Con todo, fontes dos sindicatos e do Colexio de Traballo Social criticaron, en declaracións a Nós Diario, a “ausencia clamorosa” dunha representación da Consellaría de Política Social, que enviou ao encontro unha técnica de Inspección “que só tomou notas” e mais un representante do Instituto de Seguridade e Saúde Laboral da Galiza (Issga), que recibiu a encomenda "prioritaria" de elaborar un texto de protocolo consensuado que poida aprobarse nunha vindeira reunión. O presidente da Fegamp, Alberto Varela, explicou as xestións do organismo para garantir hoxea presenza de todas as convocadas nesta mesa de traballo. Valorou positivamente “a implicación e a colaboración de todas as institucións e organizacións participantes cara a avanzar de forma áxil na elaboración do protocolo" e destacou a súa importancia diante da "alta demanda deste servizo e das particulares condicións territoriais de cada concello, xunto coa falta de financiamento que padece”, circunstancia que “fai cada vez máis complicada a súa xestión" por parte das administracións locais. Pedro Pérez, responsábel de Negociación Colectiva da CIG-Servizos, criticou a ausencia de Política Social, “quen ten as competencias e os recursos sobre a mesa” para aprobar e pór en marcha o protocolo. Pérez defendeu na reunión “un cambio de modelo nas políticas de servizos sociais”, xa que “agora mesmo o SAF é o caixón desastre que atende o que non queren os demais servizos”. A CIG recalcou a “urxencia e necesidade” destas medidas, e advertiu o seu representante, en conversa con este xornal, que o SAF do Porriño ten agora mesmo “dous acordos do Concello" para paralizar o servizo ao non garantirse a seguridade, mais "a Xunta reactívaos, e xa se viu o que pasou con Teresa [de Jesús]”, advirte Pérez. A CIG presenta un protocolo para "salvar vidas no Servizo de Axuda no Fogar" A secretaria xeral de CCOO Hábitat, Alejandra Gesto, explicou ao remate da reunión a Nós Diario que “o protocolo de seguridade non é suficiente, só é unha parte da solución”. A proposta do seu sindicato na reunión foi a elaboración “urxente” deste primeiro protocolo e continuar coas reunións “para chegar a outras solucións de máis callado”. Gesto demandou a necesidade dunha “campaña moi potente para sensibilizar as familias e que saiban o que é o SAF”. "Hoxe deuse un paso importante, pero temos que traballar nun novo modelo da axuda no fogar”, dixo Gesto, e lembrou que os concellos “están afogados co financiamento” deste servizo e que isto deriva nun “sector precarizado e con malas condicións laborais”. O Colexio de Traballo Social afirma que "xa imos tarde" O coordinador do Colexio Oficial de Traballo Social de Galicia, David Gontán, trasladou a este medio a súa “sorpresa” pola ausencia dun ou dunha representante da Consellaría de Política Social, e sinalou tamén que a entidade á que representa aínda agarda unha entrevista coa conselleira do ramo, Fabiola García, “que nunca nos recibiu". "É como se o conselleiro de Sanidade non se reunise cos médicos”, lamentou. Da reunión, destacou que “todos coincidimos nos problemas que ten o SAF, pero quen ten que tomar decisións non escoita”. Gontán explicou que o SAF “está mal desde hai moitos anos”, polo que asegurou que desde o Colexio de Traballo Social “apostamos por un protocolo amplo de seguridade, coa intención de salvar vidas, porque xa imos tarde”. Sinalou a importancia de comezar por revisar e inspeccionar “os lugares de traballo das auxiliares, os domicilios”. No encontro quedou tamén claro, segundo apuntou Gontán a Nós Diario, que o SAF é actualmente “un servizo inxestionábel para os concellos e as traballadoras en precario”.O Colexio salienta tamén a “urxencia” deste protocolo, “que non é a única solución para as traballadoras pero que pode salvar vidas, identificar situacións de risco e pór en marcha recursos”, e defende a potestade dos concellos para suspender estes servizos cando for preciso.