Un exhibicionista acusado de se masturbar diante de crianzas en Culleredo acorda coa Fiscalía o pagamento dunha multa

Un home acusado de exhibicionismo ante menores no municipio de Culleredo (comarca da Coruña) aceptou o pagamento dunha multa, no xuízo fixado para esta terza feira na Audiencia da Coruña.

Os feitos producíronse na tarde do 5 de maio de 2022 no paseo profesor Tenro Galván nun espazo de lecer con presenza de familias xunto aos seus fillos.

Segundo o escrito de cualificación fiscal, sobre as 17.30 horas dese día unha persoa que pasaba pola ponte situada na zona viu como o acusado se atopaba espido de cintura para abaixo masturbándose a unha distancia duns dez metros de onde se atopaban crianzas pequenas e adolescentes.

O home situouse detrás dun poste eléctrico para que non o visen as persoas que transitaban pola zona, "pero non impedía que fose visto polos menores que contemplaba", explica o Ministerio Público.

Acordo

Tras un acordo entre a Fiscalía e a defensa do acusado, o home aceptou o pagamento dunha multa por importe duns 2.000 euros, con prohibición de achegarse a menos de 100 metros de espazos frecuentados por menores para xogos e actividades de recreo polo tempo fixado na resolución.