A Galiza rexistrou en 2023 máis de 20 vítimas de violencia machista ao día, 7,6% máis que en 2022
53,1 mulleres de cada 10.000 sufriu violencia de xénero. Os xulgados de violencia sobre a muller, xulgados do penal e as audiencias provinciais da Galiza ditaron entre xaneiro e decembro en procesos de violencia de xénero 2.415 sentenzas, das cales 1.976, é dicir, 81,8 %, foron condenatorias.
Tanto o número de denuncias como o de mulleres vítimas de violencia machista rexistrados o ano pasado na Galiza aumentaron con respecto a 2022. Entre xaneiro e decembro contabilizáronse 7.438 vítimas, é dicir, máis de 20 ao día, o que supuxo un incremento interanual do 7,6 %.
A taxa de violencia de xénero (mulleres vítimas por cada 10.000 mulleres) na Galiza foi de 53,1, a segunda máis baixa do Estado, cuxa media se situou en 79,4. Ademais, en 2023 rexistráronse 78 menores tutelados vítimas de violencia de xénero, un menos que en 2022. Neste último dato contabilízanse os fillos e fillas de vítimas sobre os que o maltratador exerceu violencia de forma directa.
Durante o período estudado, os xulgadosgalegos rexistraron 7.483 denuncias por violencia de xénero, fronte ás 6.995 de 2022, o que supón un incremento do 7 %.
A grande maioría (5.743), 76,7 %, foron presentadas polas propias vítimas, ben nos xulgados ou en dependencias policiais, cifra que segue sendo moi superior á das denuncias presentadas polo contorno da vítima, apenas un 1,9 % do total.
As denuncias derivadas directamente de atestados policiais representaron 14,8 %; as orixinadas por partes de lesións, 5,2 % e as interpostas por terceiras persoas alleas ao contorno da vítima, 1,2 %.
Ordes e medidas de protección
Os xulgados galegos que asumen os casos de violencia sobre a muller concederon o ano pasado 1.299 ordes e medidas de protección e seguridade, un 2% máis que en 2022.
En total, recibiron 1.928 peticións destas medidas protectoras -un 2,5 % máis que en 2022-, das cales foron concedidas 67,3 %; mentres que os xulgados en funcións de garda incoaron 492, das que adoptaron 320, 65 %, segundo os datos estatísticos feitos públicos esta cuarta feira polo Observatorio contra a Violencia Doméstica e de Xénero do Consello Xeral do Poder Xudicial (CXPX).
Os xulgados de violencia sobre a muller, xulgados do penal e as audiencias provinciais da Galiza ditaron entre xaneiro e decembro en procesos de violencia de xénero 2.415 sentenzas, das cales 1.976, é dicir, 81,8 %, foron condenatorias.
No período estudado, os xulgados de menores axuizaron a 16 persoas por delitos relacionados con violencia sobre a muller, fronte ás nove de 2022, é dicir, un 77,8 % máis.
Segundo os datos estatísticos do Observatorio contra a Violencia Doméstica e de Xénero, en 2023 na Galiza aumentaron un 36,6 % os casos de vítimas que se acolleron a dispensa para non declarar, pois optaron por esta opción 493 mulleres, fronte ás 361 que o fixeron en 2022.
Por outra parte, os órganos xudiciais ditaron 679 medidas cautelares civís, cuxa finalidade é a protección da muller e dos menores en tanto se resolve o proceso penal. As máis frecuentes foron as relacionadas coa prestación de alimentos (197), que representaron o 29 % do total de medidas civís adoptadas. Ademais, adoptáronse 121 relativas á atribución da vivenda; 167 sobre suspensión do réxime de visitas; e 90 sobre suspensión da garda e custodia.