Feixoo construíu desde 2010 a metade de vivendas protexidas que o bipartito

A construción de vivendas de promoción pública (VPP) atópase en mínimos históricos na Galiza. O pasado 4 de decembro, o presidente da Xunta, Alberto Núñez Feixoo, gabábase nun acto público en Vigo de impulsar "o maior proxecto de vivenda nova [protexida] de todo o noroeste do Estado", a través da construción de até 1.600 fogares a partir de 2022. Mais os datos, polo de agora, evidencian xustamente o contrario. Segundo as cifras máis recentes achegadas polo Instituto Galego de Estatística (IGE), entre 2010 e 2020 a construción de vivendas destas características baixou 86,2%, pasando de 2.261 ás 313 do ano da pandemia. Este pronunciado descenso non se debe, porén, aos efectos na economía da crise sociosanitaria, xa que en 2018 e 2019 unicamente se construíran oito e catro VPP respectivamente. Aliás, se ben a caída na edificación de vivendas protexidas foi semellante a nivel estatal na última década —85,03%—, hai outro indicador que amosa o pouco peso que teñen os edificios de protección oficial: das 53.364 vivendas construídas na Galiza entre 2010 e 2020, só unha de cada dez —10,5%—gozaba do réxime de protección. No conxunto do Estado foron o dobre que en territorio galego neste período —22,5%—. A vivenda protexida perde terreo A situación é especialmente significativa no último lustro, xa que a vivenda libre —a excepción de 2020— mantivo unha tendencia alcista ao tempo que se estancaba a construción de VPP. Entre 2016 e 2020, as vivendas protexidas supuxeron 4,6% do total —9,9% a nivel estatal—. En total, desde que Núñez Feixoo tomou o control do Goberno galego, erguéronse no país 5.597 VPP, a metade que as construídas en apenas catro anos, entre 2006 e 2009, polo Goberno bipartito —un total de 11.602, 8,9% do total durante ese período—. Máis aló dos anos en que a coalición PSdeG-BNG gobernou a Galiza, en toda a primeira década do presente século —incluíndo o último Executivo liderado por Manuel Fraga— construíronse 27.906 VPP, isto é, 9% das vivendas totais. Nas derradeiras contas que aprobou Fraga, en 2005, o orzamento dedicado á construción de vivenda protexida ascendeu a 35,6 millóns de euros, unha cifra que experimentou un constante ascenso até 2009, cando alcanzou o seu pico cun investimento de arredor de 52 millóns de euros. En total, o Goberno de coalición destinou 177,81 millóns a esta partida, isto é, unha media de 44,45 millóns anuais.Desde que o Partido Popular retornou ao poder hai doce anos, investíronse 159,31 millóns de euros para construír vivendas en réxime de protección, o que supón un gasto de perto de 13,27 millóns por ano. De feito, na década de 1990 —cando o IGE comezou estudar estes parámetros— tamén se construíron máis vivendas protexidas que no mandato de Núñez Feixoo, tanto proporcionalmente como en números totais: 28.188 —19,9%—. Así as cousas, no que vai de 2021 rematáronse 60 novas vivendas en réxime de protección oficial —5,1% do total—. Feixoo investirá uns 87 millóns de euros anuais até 2025 en políticas de vivenda, 54% menos que o Goberno bipartito A comezos de 2021 o Goberno galego presentou as liñas estratéxicas do Pacto social pola vivenda 2021-2025, un documento que prevé investir no vindeiro lustro un total de 433 millóns de euros para políticas públicas en materia de vivenda —non só para construír novas VPP, senón que inclúe medidas para facilitar o acceso ás mesmas a través da compra ou dun alugueiro social—. Sería un gasto de perto de 87 millóns anuais, por baixo do investimento medio do Goberno bipartito —187,17 millóns de euros por ano— e do último Executivo de Fraga —114,4 millóns—. Cómpre salientar, así mesmo, as dificultades para acceder a unha vivenda protexida. Segundo un estudo presentado pola promotora inmobiliaria Adeas Homes, na Galiza a complexidade é de 7,2 puntos sobre dez, o mesmo dato que o conxunto do Estado e só superado por Balears —7,8—, Catalunya —7,6—, Andalucía —7,5— e Canarias —7,3—. Tamén pon o foco nesta realidade a Rede Galega contra a Pobreza, que a través da súa campaña 'Emerxencia Vivenda' evidencia que a Galiza ten un dos parques de vivenda social máis cativos do Estado: só tres de cada mil vivendas —0,32%— gozan do réxime de protección, fronte a 0,96% da media estatal. No conxunto da Unión Europea, salientan, as VPP representan 9,3% das vivendas totais. O prezo do ladrillo dispárase A falta de solucións habitacionais é máis palpábel, se callar, tendo en conta que o prezo medio da vivenda estaba ao feche do primeiro semestre do presente ano, segundo o IGE, en 175.274,8 euros. Desde 2009, incrementouse en 27%, e mantén un progresivo e incesante ascenso desde 2013. O crecemento foi especialmente acusado en 2021, xa que, segundo as cifras que vén de facer públicas o Instituto Nacional de Estatística (INE), no terceiro trimestre o prezo aumentou 5,8% en comparanza co mesmo período do ano anterior, situando a Galiza como un dos territorios do Estado cunha maior variación interanual. No que vai de ano materializáronse 16.190 contratos de compravenda, dos cales 618 se corresponderon con vivendas en réxime de protección oficial —3,8%—. Humidades, mal illamento e outras deficiencias Resultan especialmente salientábeis á hora de analizar a necesidade de incrementar o parque de vivendas protexidas, aliás, as múltiples eivas que presentan boa parte das vivendas galegas —independentemente de se son libres ou protexidas—. En concreto, unha de cada cinco persoas —22,2%— afirma padecer humidades, mentres unha de cada sete —14,2%— denuncia "deficiencias de illamento térmico ou acústico" e 8,8% alega "falta de espazo". Así mesmo, 13,9% das persoas enquisadas lamentou o "deficiente acceso a internet" desde cadanseus fogares. As deficiencias estruturais están, segundo esta estatística, estreitamente vencelladas aos limiares de renda. Así, cuestións como as humidades ou os problemas de illamento son máis comúns nas vivendas que habitan persoas con menos de 1.000 euros mensuais de ingresos. 799 execucións hipotecarias no que vai de ano Segundo as cifras que vén de compartir o Instituto Nacional de Estatística (INE), no terceiro trimestre de 2021 producíronse na Galiza 241 execucións hipotecarias, o que deixa un total de 799 desde o pasado xaneiro. En comparanza co trimestre anterior supón unha caída de 13%; de 64%, se contrapomos os datos cos do mesmo período de 2020. Das 241 execucións realizadas no último trimestre, máis da metade —157— eran vivendas.