A Feira de Santos desborda Monterroso nunha edición marcada pola ausencia de gando
Monterroso, na comarca da Ulloa, volveu quedar pequeno un ano máis para acoller ás miles de persoas que acudiron á famosa Feira de Santos que se desenvolve na localidade desde hai máis de 800 anos, nunha edición marcada pola ausencia de gando.
A prohibición de feiras, certames, poxas, mercados e concentracións de gando para protexer os animais fronte á dermatose nodular contaxiosa (DNC), aprobado pola Consellaría do Medio Rural deixou este ano a feira de Monterroso sen unha das principias liñas de negocio. Porén, a ausencia do vacún non restou asistencia ao evento.
Milleiros de persoas procedentes de toda Galiza encheron a localidade desde primeiras horas da mañá para facer as súas tradicionais compras, visitar os postos de venda, socializar e comer o polbo. Neste sentido, os responsábeis dos postos de hostalaría destacaron a Nós Diario a gran participación deste ano.
Un ano máis o elevado número de visitas, obrigou aos asistentes a desprazarse a comer a distintos estabelecementos hostaleiros das distintas parroquias Monterroso e dos concellos limítrofes de Palas de Rei, Antas de Ulla, Portomarín, Taboada, Guntín ou mesmo Melide, emprazado a 25 quilómetros de distancia.
Produtos de tempada
O mercado produtos de tempada volveu ser o centro da feira, por iso no recinto A Cúpula, con 10.000 metros cadrados, concentráronse centos de postos de noces, castañas, verdura de tempada, queixos, pan ou mel.
A maioría dos titulares destes postos procedían da propia comarca da Ulloa ou das zonas limítrofes da Terra de Melide e das comarcas de Arzúa e do Deza. Ao tempo, noutras partes do recinto situáronse postos de venda de cestaría, olaría e manufacturas artesanais.
O nivel de negocio desenvolvido na feira de Monterroso resultou importante, destacando a satisfacción das persoas que puxeron á venda os seus produtos. Porén, as vendas directas e o sentido das transaccións impiden coñecer con precisión o volume de negocio que se move cada ano.
Unha historia que se remonta a Afonso VIII
A gran fortaleza Feira de Santos Monterroso é a súa tradición. A mesma vense realizando desde 1219, situándose a súa orixe na política de apoio á actividade comercial promovida polo rei galego Alfonso VIII.
A "Feira de Feiras" da Galiza, como é coñecida a cita de Monterroso, non defraudou. Neste sentido, produtores, feirantes e comerciantes e, sobre todo visitantes, prepáranse para unha nova edición.