As estradas galegas acumulan unha corentena de tramos de alta perigosidade

As estradas convencionais e as autoestradas da Galiza aglutinan un total de 38 “puntos negros” para o tráfico rodado nos que están considerados algúns dos quilómetros “máis perigosos” de todo o Estado español, segundo o último informe presentado este mes de abril por Automobilistas Europeos Asociados (AEA) cos últimos datos dispoñíbeis dos índices de perigosidade e de sinistralidade do Ministerio de Transportes e Mobilidade Sostíbel, relativos ao período comprendido entre os anos 2018 e 2022. En total, na rede viaria galega hai 21 puntos quilométricos de estradas convencionais cun elevado índice de sinistralidade, tramos nos que o número de accidentes nos que houbo algunha morte ou persoa ferida ascendeu en 2022 —o rexistro máis recente— a 87 e as vítimas totais —feridas ou falecidas—, a 110. No caso das autoestradas galegas son a AP-9 e a AP-53 as que concentran os maiores puntos perigosos: 15 no caso da Autopista do Atlántico e 2 tramos na Autopista Central da Galiza. O Eixo Atlántico pide avanzar en infraestruturas: "Son a Procesión dos Caladiños no Goberno e a Confraría do Santo Lamento na oposición" O informe da AEA pon de manifesto a perigosidade xeneralizada nas estradas convencionais da Galiza, na súa maioría cunha alta densidade de tráfico ben por falta de alternativas con vías de alta capacidade ou ben por ser a opción máis barata e sen peaxes para viaxar. A N-525, que une Benavente (Zamora) e Santiago de Compostela é a que rexistra máis puntos cun índice de perigosidade elevado: 8 tramos nos que, segundo os últimos datos do Ministerio, se rexistraron 14 accidentes con vítimas mortais ou persoas feridas e un total de 19 persoas afectadas por estes sinistros. *ACV: Nº de accidentes con persoas feridas e/ou vítimas mortais. *VIC: Nº de persoas feridas ou falecidas. *IPM: Índice de Perigosidade Medio (relación entre o número de accidentes con vítimas e o número de vehículos que utilizan a estrada). A N-120 -entre Logroño e Vigo- ao seu paso pola Galiza é a segunda das estradas convencionais do país con máis tramos perigosos, con 5 nos que se rexistraron 18 accidentes de tráfico con feridos ou mortos, e 22 persoas afectadas por estes accidentes. A N-6, que une A Coruña e Madrid, é outra das estradas convencionais con máis puntos perigosos, un total de tres tramos que no ano 2022 concentraron 8 accidentes con persoas implicadas e 11 vítimas. Tamén a N-647, entre Compostela e Lugo, rexistra dous tramos con alta perigosidade no traxecto entre Melide (Terra de Melide) e O Pino (comarca de Arzúa): só nos quilómetros 63 e 80 houbo nun ano 14 accidentes con vítimas que afectaron 16 persoas. Outras das estradas convencionais con elevados índices de perigosidade son a N-541, que une Ourense e Pontevedra, en cuxo quilómetro 52 se produciron nun ano 4 accidentes con vítimas e 5 persoas afectadas; a N-551, que une Tui e Valença (Portugal) a través da Ponte internacional —traspasada á Xunta da Galiza polo Estado en febreiro— e que só nun tramo rexistrou en 2022 un total de 15 accidentes con vítimas e 19 persoas feridas ou mortas neses sinistros. Tamén está entre as estradas convencionais con máis sinistralidade da Galiza a N-555, entre Redondela (comarca de Vigo) e a contorna do aeroporto de Peinador, nun tramo no seu quilómetro 3 no que se rexistraron 14 accidentes de tráfico con feridos ou mortos que involucraron 18 persoas. A perigosidade das autoestradas galegas No caso das vías de alta capacidade, outro estudo presentado pola AEA revela que 17 tramos das autoestradas galegas figuran entre os 75 máis perigosos de todo o Estado español. Só a Autoestrada do Atlántico concentra 15 destes puntos quilométricos considerados “perigosos”. No terceiro posto a nivel estatal sitúase, como o de maior risco dentro do territorio galego, o quilómetro 159 da AP-9, en Puxeiros (Mos, comarca de Vigo). Por este tramo circulan cada día, de media, 39.557 vehículos, e nun só ano producíronse 32 accidentes nos que houbo persoas feridas ou vítimas mortais. Nestes sinistros en Puxeiros resultaron feridas leves e graves ou mesmo mortas un total de 56 persoas. A autovía entre Santiago e Lugo non estará completa até finais de ano Os principais “puntos negros” nas autoestradas da Galiza corresponden aos lugares con máis incidencia media de tráfico, tales como a entrada e a saída da AP-9 en Vigo. Nesta zona o tráfico medio diario de vehículos supera os 53.000. De feito, o quilómetro 152 desta vía, entre os túneles da Madroa e Candeán, está considerado polas persoas condutoras, fundamentalmente de vehículos pesados, como o principal “punto crítico” polo número de accidentes de camións que rexistra ao ano. Desprazamentos agardados A Dirección Xeral de Tráfico (DXT) abriu o pasado 11 de abril o dispositivo de alerta para os desprazamentos por estrada que se agardan nestes días de Semana Santa. Até o vindeiro día 21 a DXT agarda na Galiza máis de 1,5 millóns de desprazamentos, que superarán os 2 millóns en toda a zona noroeste da península (13% do tráfico total). As estradas galegas nas que Tráfico prevé unha maior intensidade e que se verán “máis afectadas” son a AP-9, a A-6, a A-8, a A-52, a A-55 e mais a nacional N-550. Aliás, reforzaranse os controis de alcol e drogas. Mos, á cabeza: Os cinco radares que máis denuncias rexistran A Dirección Xeral de Tráfico (DXT) conta con máis de 1.000 radares nas estradas de todo o Estado español que representan até 30% das denuncias anuais formuladas a condutores e condutoras por exceso de velocidade. En 2023, último ano con datos, interpuxeron 3,3 millóns de denuncias. Na Galiza a DXT ten instalados arredor de 80 radares, o sexto territorio con máis dispositivos a nivel estatal. De todos eles, cinco en concreto son os que máis denuncias presentan cada ano: un total de 105.044 denuncias por exceso de velocidade en 2023. O máis activo é o localizado no quilómetro 9,2 da autovía A-55, en Mos (comarca de Vigo), que nesa anualidade concentrou até 45.276 denuncias. O seguinte radar máis ‘produtivo’ da DXT na Galiza é o do Fiouco (Mondoñedo, A Mariña), no quilómetro 545,1 da A-8, con 17.618 denuncias. Tamén no concello de Mos, o radar situado no quilómetro 11,7 da A-55 puxo outras 15.229 denuncias. En Arteixo (comarca da Coruña), no quilómetro 11,7 da AG-55 está outro dos radares máis activos do país, con 13.533 denuncias, e na Autovía das Rías Baixas (A-52), antes do túnel de Folgoso (A Caniza, A Paradanta), no km 282,5, o radar rexistrou 13.388. O BNG reclama ao Goberno estatal "impulsar infraestruturas ferroviarias e viarias" estratéxicas para Valdeorras