Os dous superviventes do accidente de autobús en Cerdedo-Cotobade levaban posto o cinto
O condutor prestou declaración a última hora da quinta feira na Comandancia da Garda Civil en Pontevedra
Os dous únicos superviventes do accidente de autobúsa pasada Noiteboa nunha ponte do concello de Cerdedo-Cotobade levaban posto o cinto de seguridade no momento do sinistro que causou sete mortos.
A Garda Civil conta xa cos testemuños da pasaxeira e o condutor para incorporar á investigación sobre as causas do accidente. O último en prestar declaración foi o chofer, que acudiu a última hora da tarde de onte á Comandancia da Benemérita en Pontevedra. Antes, axentes da Garda Civil desprazáronse ao hospital onde permanece ingresada a pasaxeira para solicitar a súa versión dos feitos.
Así o trasladaron fontes da investigación consultadas por Europa Press, que confirman que os dous únicos superviventes da traxedia levaban posto o cinto de seguridade.
Agora, a reconstrución do sinistro determinará se eran os únicos que o levaban no autocar ou se, por contra, algunha das vítimas mortais non o tiña posto no momento da saída de vía.
Deste modo, os relatos dos superviventes incorporaranse agora ao dosier que será remitido ao xulgado de Instrución número 2 de Pontevedra.Tamén pesará a reconstrución do accidente, que a pasada cuarta feira fixeron no mesmo lugar do sinistro axentes expertos chegados de Madrid.
Durante esa xornada, o Equipo de Reconstrución de Accidentes de Tráfico (ERAT) solicitou os datos necesarios para reproducir en simuladores o accidente.
Para iso empregaron drons e sistemas láser para realizar unha copia tridimensional da curva e a ponte, ademais de recoller datos sobre a drenaxe da estrada na zona ou simular a resposta de freada cunha furgoneta.
Máis tarde, desprazáronse ás instalacións de Monbus --empresa titular do autobús sinistrado-- para analizar os restos do vehículo, recuperados do río Lérez no mediodía da terza feira. Ademais, tamén levaron a cabo a análise dun autocar de características similares.
Ademais da carrocería, a análise do tacógrafo, así como do ABS e do GPS, serán claves para a investigación, cuxas conclusións tardarán "semanas" en ser definitivas, segundo trasladaron as fontes consultadas.