Dous novos gromos suman 7 positivos nas localidades de Vilar de Barrio e Baños de Molgas

As autoridades sanitarias identificaron e illaron nas últimas horas a un total de sete persoas positivas en COVID-19 en dous focos localizados nas localidades de Vilar de Barrio e Baños de Molgas.

Segundo informaron fontes da área sanitaria, dáse a circunstancia de que algúns dos afectados por estes dous brotes son persoas de idade avanzada -79, 90 e 91 anos-, que se atopan hospitalizados.

En concreto, en Baños de Molgas, deu positivo por coronavirus unha muller de 79 anos, que se atopa ingresada, así como dous dos seus contactos, polo que o total de casos elévase a tres.

En relación a este brote, Sanidade mantén en seguimento os contactos identificados, aos que se instou a manter a corentena, e está á espera de coñecer os resultados de todas as PCR practicadas.

En total, identificáronse 21 contactos, parte deles residentes fóra da Galiza, aínda que está aberto o proceso por se fose necesario ampliar a procura de contactos dentro da comunidade.

Por outra banda, esta quinta feira  ingresou no Hospital Universitario de Ourense (CHUO) un home de 90 anos cuxa muller, de 91, permanecía desde a cuarta feira no Hospital de Verín. Ambos deron positivo en COVID-19 e Sanidade prevé trasladar este xoves á muller á capital provincial.

Fontes da área sanitaria apuntaron que nestes momentos continúase o seguimento dos contactos desta parella, que se estableceu inicialmente en 10 persoas próximas a ambos, aos que se pediu que garden corentena.