Detectan o primeiro caso na Galiza da variante brasileira da Covid

O Servizo de Medicina Preventiva da Área Sanitaria de Vigo detectou o primeiro caso en Galiza da variante brasileira de Covid-19, segundo confirmaron a Europa Press fontes do Servizo Galego de Saúde (Sergas).

Así, foi detectada nun mariñeiro peruano procedente de Sudamérica, sobre o que se sospeitou "que podía ter esta variante". Neste sentido, o Sergas apuntou que non se secuencian todas as probas PCR, senón "só aquelas con sospeita doutra variante".

No caso deste home, Medicina Preventiva fixo as comprobacións ao ter en conta os datos de procedencia e as características clínicas do paciente. Así, fíxose a secuenciación que confirmou a variante brasileira.

O xefe de Microbioloxía da Área Sanitaria de Vigo, Benito Regueiro, trasladou a Europa Press que o achado desta variante produciuse no marco do proceso de vixilancia que manteñen "sistematicamente" para o Ministerio de Sanidad e o Sergas.

En Galiza a variante máis predominante é a británica. No entanto, na Galiza, concretamente na Área Sanitaria de Vigo, o pasado mes de xaneiro confirmouse o primeiro caso en España da variante surafricana.

Segundo indicou Regueira, en Vigo xa foron detectadas "varias variantes que hai que vixiar", entre elas, ademais da británica, a surafricana e, nos últimos días, tamén a brasileira e a 'B.1.525' (que é "unha variante con bastantes mutacións e con certa capacidade para escaparse ao sistema inmunológico").

En todo caso, indicou que o que se están atopando con estas novas variantes, que están "a tentar competir coa inglesa", son maioritariamente "casos asintomáticos ou con poucos síntomas, tipo catarrales", mentres que os casos máis graves corresponden á variante máis frecuente, a británica.