Desmantelan un punto de venda de droga en Carballo a raíz dun aviso por violencia de xénero

A Garda Civil do Posto Principal de Carballo destapou un punto de venda de droga por mor dun aviso por malos tratos na localidade de Carballo.

Segundo informan nun comunicado, os feitos ocorreron cando a patrulla actuante acudiu a un domicilio da localidade tras recibir un aviso dun caso de violencia de xénero.

Tras asistir, procederon á detención do suposto agresor, atopando indicios de que este domicilio puidese ser un punto de venda de substancias estupefacientes.

No transcurso da actuación policial, a Garda Civil atopou unha bolsa de plástico con 21 doses de cocaína, 32 gramos de marihuana nunha báscula de precisión, manifestando o detido que eran da súa parella, que se dedica á venda de drogas no domicilio conxugal.

Disposición xudicial

Por estes feitos a Garda Civil procedeu ao traslado o home que xa tiña antecedentes por ambos os delitos, xunto con substancias estupefacientes a Dependencias Oficiais para ser posto a disposición xudicial no Xulgado de Violencia sobre a Muller e Instrución de Carballo. Procedeu á investigación de ambos por un delito contra a saúde pública.