Descarrilan tres vagóns dun tren de mercadorías en Monforte

Un tren de mercadorías sufriu esta quinta feira o descarrilamento de tres vagóns na estación de Monforte (Terra de Lemos), segundo transcendeu esta sexta feira. Adif relatou que a incidencia produciuse ás 20.30 horas durante a realización de manobra dun tren de Renfe Mercadorías (Vigo Guixar-León Mercadorías).

"A esa hora produciuse o descarrilamento de tres vagóns do devandito tren, afectando as entradas e saídas das vías 14 a 24, vías utilizadas polos trens de mercadorías, polo que non se viron afectados trens de viaxeiros", explicou. Segundo fontes de Renfe, o incidente tivo lugar nas "vías de apartado" e non afectou o tráfico nin houbo contratempos importantes.