As denuncias por violencia machista aumentan na Galiza un 3,6% tras o estado de alarma

Os xulgados galegos recibiron no terceiro trimestre do ano 1.767 denuncias por violencia machista, un 3,6% máis que no mesmo período do ano pasado, cando se presentaron 1.705, segundo informa o Tribunal Superior de Xustiza de Galiza (TSXG) de acordo cos datos estatísticos feitos públicos polo Observatorio contra a Violencia Doméstica e de Xénero do Consello Xeral do Poder Xudicial.

A gran maioría (1.397) chegaron aos xulgados a través de atestados policiais con denuncia da vítima.

O número de mulleres que aparecen como vítimas tamén incrementa, pois entre o 1 de xullo e o 30 de setembro de 2020 contabilizáronse 1.764, fronte ás 1.525 do ano pasado nas mesmas datas, o que supón un crecemento do 15,7%.

Sobre os datos, o TSXG precisa que, para analizalos, hai que ter en conta a incidencia da crise da Covid-19 na Administración de Xustiza, sobre todo nos meses anteriores ao período analizado, os máis afectados pola declaración do estado de alarma.

"Como consecuencia da fin do confinamento e o levantamento da suspensión dos prazos procesuais, no terceiro trimestre do ano rexistrouse un aumento interanual na maior parte dos indicadores que miden a actividade dos xulgados na súa loita contra a violencia de xénero", engade.

Galiza, no entanto, seguiuse mantendo como un dos territorios coa taxa de violencia de xénero (mulleres vítimas por cada 10.000 mulleres) máis baixa do Estado, cun cociente de 12,6 persoas, fronte ás 17,2 de media estatal.

O número de mulleres que aparecen como vítimas tamén incrementa, pois entre o 1 de xullo e o 30 de setembro de 2020 contabilizáronse 1.764, fronte ás 1.525 do ano pasado nas mesmas datas, o que supón un crecemento do 15,7%

De acordo cos datos do Observatorio contra a Violencia Doméstica e de Xénero do Consello Xeral do Poder Xudicial (CGPJ), na Galiza aumentaron os casos de vítimas que se acolleron a dispensa para non declarar.

Se no terceiro trimestre de 2019 optaron por esta opción 84 mulleres, este ano fixérono 364, o que supón 20,6% das vítimas, un 333% máis que en 2019. Durante o terceiro trimestre do ano solicitáronse 595 ordes de protección nos órganos xudiciais da Galiza, un aumento do 11%. O 88% das 233 persoas axuizadas por delitos relacionados con violencia machista entre o 1 de xullo e o 30 de setembro deste ano foron condenadas.

O número de vítimas menores tuteladas durante o trimestre analizado foi de nove. Este indicador permite coñecer o número de fillos e fillas menores das mulleres maltratadas que son tamén vítimas da violencia machista.