Denuncian unha vertedura de hidrocarburos do porto deportivo á rede de saneamento de Baiona

A Garda Civil denunciou unha vertedura de hidrocarburo do porto do municipio de Baiona na rede de saneamento municipal e que ocasionou un forte cheiro.

Segundo informou o Instituto Armado nun comunicado, o 24 de novembro a patrulla do Seprona de Vigo recibiu un aviso no que informaba dun forte cheiro a hidrocarburo na rede de sumidoiros pública de Baiona.

Ese día o alcalde publicou un bando municipal no que constaba que se detectaron verteduras de combustíbel en varios puntos da rede de saneamento municipal, o que xerou "a presenza de cheiros e posíbeis gases perigosos e inflamábeis".

Os axentes, unha vez na localidade e tras realizar diferentes xestións, situaron unha posíbel vertedura de hidrocarburo, realizado en datas concordantes cos días da emanación de cheiros no saneamento, no interior das instalacións do porto deportivo de Baiona.

Continuando coas xestións para o esclarecemento do feito e tras investigacións realizadas, o 26 de novembro, efectuaron unha nova inspección no interior das instalacións do porto deportivo de Baiona.

Desta forma, os axentes concluíron que en días pasados o depósito de almacenamento de gasolina, sito no interior das instalacións do porto deportivo, sufriu filtracións por causas descoñecidas de auga salgada, mesturándose co carburante existente.

Ante isto o persoal do porto, con axuda dunha mangueira, proceden ao baleirado da mestura existente no interior do depósito a unha fosa de decantación que posteriormente se comunica co saneamento municipal da localidade.

A Garda Civil denunciou os feitos ante o Concello de Baiona, Mediombiente e Portos de Galiza.