Alertan do novo proxecto para a mina de Touro: "Un desastre para as comarcas de Santiago e Arzúa, o Ulla e a ría de Arousa"
A plataforma veciñal Cornado Mina Non asegura que o novo proxecto para a mina de Touro pretende utilizar "a escusa da transición enerxética" para promocionar un proxecto "que non é difícil intuír que, en esencia, en pouco ou nada se vai a diferenciar do xa presentado".
Plataforma veciñal Cornado Mina Non asegura que o novo proxecto para a mina de Touro presentado por Cobre San Rafael, filial de Atalaia Mining e Explotacións Galegas, "pode supor un desastre de clase mundial" para as comarcas de Santiago e Arzúa, o Ulla e a ría de Arousa.
Segundo sinalaron nun comunicado, a compañía pretende utilizar, nun segundo intento, "a escusa da transición enerxética" para promocionar un proxecto "que non é difícil intuír que, en esencia, en pouco ou nada se vai a diferenciar do xa presentado", finalmente rexeitado pola Xunta pola súa inviabilidade técnica e ambiental.
"De cara a convencer aos potenciais investidores, a mineira incrementou a cifra de recursos, sobredimensionando o xacemento de cobre até as 103 megatoneladas fronte ás 91 iniciais", aseveran desde a asociación, que lembra ademais que "entre as zonas de concesión de explotación, exploración e investigación", a empresa mantén unha "aberrante e alarmante" cifra de extensión potencial que oscila entre as 12.270 hectáreas de superficie da súa presentación corporativa e as 15.300 que aparecen na súa documentación técnica -"unha área que multiplica por cinco a superficie metropolitana de Santiago".
A plataforma criticou a estratexia da empresa, que alude ao termo 'world class' -'de clase mundial'- "tentando manipular á opinión pública coa suposta importancia dun xacemento que en realidade é de baixa lei", é dicir, de 0,41 gramos de cobre por tonelada de pedra procesada
A plataforma criticou a estratexia da empresa, que alude ao termo 'world class' -'de clase mundial'- "tentando manipular á opinión pública coa suposta importancia dun xacemento que en realidade é de baixa lei", é dicir, de 0,41 gramos de cobre por tonelada de pedra procesada.
No comunicado explican que isto se traduce en que, para obter unha tonelada de cobre hai que utilizar "unha inmensa cantidade de reactivos e produtos químicos de alta toxicidade -sustancias nocivas para o ser humano e a biodiversidade- que quedarían almacenados indefinidamente nos depósitos".
"Inviabilidade do proxecto"
Para a plataforma existe outro factor "clave" na inviabilidade do proxecto, que reside na publicidade realizada pola mineira sobre a súa filosofía de 'verteduras cero' e nun "suposto" espesado de lodos a través da eliminación de auga, favorecendo así o "almacenado en seco" e "unha total seguridade ante accidentes mineiros".
Os expertos sinalan que para evitar desastres ambientais por rotura de balsas, a clave é espesar os lodos e reducir a porcentaxe de auga dos mesmos "tanto como resulte posíbel", dado que a presenza de auga multiplica o risco de licuación do material almacenado, "o que ante un fallo dos diques de contención dunha presa mineira podería provocar unha catástrofe a gran escala".
A este respecto, a plataforma subliña que, desde que a principal explotación de Atalaia Mining, Riotinto, renovou as súas operacións en 2015, a vertedura de residuos contén, segundo datos da propia compañía, un 65% de líquido e un 35% de sólido. Isto, para a asociación, converte o sistema de balsas "nunha auténtica bomba de reloxaría para a zona costeira". Por todo isto, a Plataforma veciñal Cornado Mina Non rexeita "as falsas promesas que desde a mineira tentan confundir e convencer" tanto a confrarías como a produtores de cultivos mariños.