Consumo vai regular os requisitos que debe cumprir unha máscara hixiénica
Pretende, entre outras cuestións, que as persoas usuarias saiban con exactitude, cantas veces se poden lavar antes de que deixen de ser efectivas.
O Ministerio de Consumo ditará unha orde cos requisitos que debe cumprir unha máscara hixiénica, das que existen unha gran variedade no mercado, para incidir na veracidade da súa protección fronte á Covid-19.
Fontes do ministerio que dirixe Alberto Garzón avanzaron a Efe que do que se trata agora é de desenvolver un texto normativo que defina o concepto de "máscara hixiénica" ou "cobertor facial comunitario", como primeiro paso para endurecer a regulación deste produto para que sexa realmente eficaz ante o coronavirus.
Entre a poboación sen síntomas de Covid-19 e que non está en contacto con persoas contaxiadas, popularizouse o uso de máscaras hixiénicas. Isto motivou que no mercado existan numerosos produtos deste tipo que, con todo, non se axustan aos requisitos mínimos de protección facial, e nos últimos días diversos centros sanitarios prohibiron o acceso ás súas instalacións con máscaras de tea.
O ministerio quer ampliar os requisitos de etiquetaxe, publicidade e control destes produtos, e así garantir que a poboación sexa consciente das súas características e do obxectivo que deben perseguir estes produtos.
Consumidores
Do que se trata, segundo Consumo, é de que os consumidores saiban con exactitude e de forma clara cantas veces se poden lavar antes de que perdan eficacia para facer fronte á pandemia e doutra serie de aspectos que deben asegurar cos seus materiais.
Prohibirase a utilización de inscricións, signos, anagramas, debuxos ou indicacións que poidan dar lugar a engano sobre o tipo de máscara que o consumidor está a adquirir. Tamén se regulará o uso e información do comercio dos filtros que son utilizados "a modo de consumíbeis e que son intercambiábeis", porque adoitan comercializarse de forma separada das máscaras hixiénicas e nestes momentos tampouco están regulados de forma específica.