Comparar é chorar

Se choras por perder o sol, as bágoas non te deixarán ver as estrelas. Rabindranath Tagore (1861-1941). Filósofo e escritor indio. Realizo con este artigo a quinta entrega de comparacións do que existe na Galiza para valorar as posibilidades que temos de mellora nun país gobernado nos últimos 15 anos polo PP, que, entre a ineficiencia e a irresponsabilidade, perde a oportunidade de achegarnos a unha comunidade de primeiro nivel en lugar de manternos, en moitas cousas importantes, por baixo das nosas posibilidades. Por que Galiza está á cola do Estado e da Unión Europea en persoal de enfermaría? O dato é do Ministerio de Sanidade. Estamos só por riba de Murcia. Temos a ratio de enfermeiras por cada 1.000 habitantes en 5,13, mentres a media do Estado é de 6.28 e a media de Europa é de 8,5. Galiza precisaría 10.364 enfermeiras máis para cumprir a ratio que marca a OMS. E algo máis dramático: no ano 2023, 510 enfermeiras foron traballar fóra da Galiza. Segundo datos do Imserso, en 2024 o gasto público no país foi de 848 euros por poboación potencialmente dependente, o que nos coloca como a terceira peor comunidade no Estado en gasto por dependente. Estamos 529 euros por baixo do gastado no Estado, que é de 1.377 euros. En canto aos datos de prazos de agarda dentro do Sistema de Atención: unha persoa galega que solicita a dependencia agarda 387 días ata que se lle concede o servizo ou prestación despois de ser valorada. Somos os cuartos peores do Estado, que está en 330 días. A normativa fala de “non esperar máis de 180 días”. Un despropósito! Dende o 2017 a novembro de 2024, faleceron na Galiza 838 persoas que estaban pendentes de valoración e outras 5.719 morreron esperando a prestación... que tiñan concedida previamente! Segundo o informe da Rede Europea de Loita contra a Pobreza e a Exclusión Social, as pensións soben 2,8%. Na Galiza, 375.658 galegos e galegas están cobrando por baixo do limiar da pobreza. Esta cifra di que somos os máis empobrecidos do Estado! Cobran 180 euros menos o mes. Na Galiza, a media é de 1.080 euros. Somos os segundos peores do estado. Vaia récord! Segundo o INE, o salario medio mensual na Galiza en 2023, en bruto, foi de 2.136 euros: estamos con 137 euros menos que a media estatal, que é de 2.273 euros. O traballo dunha galega é menos rendíbel que o de outra persoa traballadora do Estado. Por que? Os orzamentos galegos Nos orzamentos da Xunta para o 2025 vemos que dende a Consellaría de Sanidade se aumenta o gasto en capeláns, ata os 791.000 euros: 321.000 euros máis que no 2024. En 2020 era de 701.000. Dende a Plataforma SOS Sanidade Pública de Compostela, consideramos isto “un anacronismo e algo incomprensible”. Para saber se un gobernante é bo ou malo, valórase como e en que gasta os orzamentos? Como nunha familia, se gastamos máis do que ingresamos: malo! Pois ben, a débeda pública da Galiza, está en máximos históricos: alcanza os 13.083 millóns de euros (case o mesmo que todo o orzamento para o 2025). Pero a situación é máis dramática, pois estamos pagando 180 millóns de euros nos xuros desa débeda. E que fai o señor Rueda? Rexeita a quita de 2.433 millóns de euros que o Estado vai condonar ás autonomías. É isto lóxico? Que intereses ten o PP para este despropósito? A quen beneficia esa situación? E isto, faino un presidente que endebeda a cada galega en 3.372 euros. Terá responsabilidades esta decisión? Por que o desemprego na Galiza aumenta un 2% mentres no Estado español permanece estable? En aumento do desemprego, Galiza é a terceira comunidade (pola cola) do Estado, cunha suba de 1,95% cando a media estatal está nun ascenso de 0,6%. Con respecto ao descenso de persoas afiliadas á Seguridade Social, Galiza é a quinta do Estado, cunha caída de 0,64%. Galiza conta con 313 concellos: como se explica que 137 deles carezan de servizo de ambulancia medicalizada? De xaneiro a xuño do 2024, 62 empresas marcharon da Galiza e situaron o seu domicilio social fóra do país, son unha media de 10 empresas ao mes... incluso compañías que reciben subvencións do Goberno do PP. Como é posible este mal facer? Galiza conta con 313 concellos: como se explica que 137 deles carezan de servizo de ambulancia medicalizada? Que teñamos para todo o país dous helicópteros de soporte vital avanzado... e moito do tempo inoperativos por diferentes motivos. O BNG presentou esta iniciativa no Parlamento para dar resposta ás necesidades de transporte sanitario e o PP opúxose. Como se explica? P.D. Con esta quinta entrega, remato este ciclo de cinco artigos, onde expuxen a realidade do que sucede na Galiza, comparándonos con outros lugares e situacións... pero, sen esforzarme moito, podería encontrar motivos para outros cinco. Que pena!