Covid: casos activos e contaxios rexistrados seguen en descenso
Galiza chega ao ecuador desta semana cos novos contaxios de Covid-19 por baixo do centenar por terceira xornada consecutiva, tras rexistrar outros 82, mentres que os casos activos seguen en descenso por undécimo día seguido e sitúanse en 2.206. Por contra, os pacientes ingresados ascenden lixeiramente a 111, dous máis.
Segundo os datos actualizados na mañá desta cuarta feira pola Consellaría de Sanidade, con rexistros até as 18 horas desta terza feira, recollidos por Europa Press, descenden a 21 as persoas ingresadas en UCI na Galizaa, catro menos, mentres que aumentan a 90 as que permanecen noutras unidades, seis máis.
Por áreas sanitarias, a presión hospitalaria sobe lixeiramente nas da Coruña e Cee, Lugo, Pontevedra e O Salnés e Ferrol; descende nas de Vigo e Ourense; e mantense na de Santiago e Barbanza.
En canto aos casos activos de Covid-19 manteñen a tendencia descendente por undécima xornada consecutiva e sitúanse en 2.206, dúas menos que a xornada anterior, ao haber máis altas (83) que novos contaxios (82) ao que se engade un falecido.
As infeccións activas descenden nas áreas da Coruña e Cee (-6) e de Pontevedra e O Salnés (-14); increméntanse lixeiramente nas de Santiago e Barbanza (+4), Lugo (+6) e Ferrol (+8), mentres que seguen sen cambios nas de Ourense e Vigo.
Pola súa banda, os novos contaxios de Covid-19 seguen por baixo do centenar por terceira xornada consecutiva con 82, despois de iniciar esta semana con 76 e os 90 do día anterior, que supoñen oito menos que os actualizados este mércores.
Polo seu lado, a taxa de positividade descendeu por baixo do 2% a un 1,53%. Continúa así por baixo do 5% que a Organización Mundial da Saúde (OMS) fixa para dar por controlada esta pandemia.
Desde o inicio da pandemia as persoas falecidas diagnosticadas con Covid-19 sitúanse en 2.420, ao notificar a Consellaría de Sanidade unha nova vítima. O último óbito corresponde a un home cuxo falecemento foi comunicado na tarde desta terza feira polas autoridades sanitarias, aínda que se produciu na xornada da segunda feira. Atopábase ingresado no CHOP e tiña patoloxías previas.