Un bombeiro de Vigo resultou ferido por unha árbore ao atender unha emerxencia
Esta sexta feira un bombeiro do parque de Teis de Vigo resultou ferido por unha árbore mentres atendía unha emerxencia na rúa da Maceiriña. Agora o home atópase hospitalizado mais con prognóstico estábel dentro da gravidade.
O Goberno local informou de que os bombeiros tiveron que actuar en máis de 50 ocasións nas últimas 24 horas debido ás incidencias provocadas polo temporal Ciarán. A maior parte destas tratábanse de caídas de cableado e árbores como neste caso, na vía pública, así como tamén desprazamentos de contedores.
O temporal tamén provocou que o Concello suspendese as visitas teatralizadas ao cemiterio de Pereiró previstas para esta fin de semana. Tamén se aprazou o roteiro Camiño a Camiño programado para este domingo, día 5 de novembro, ata o domingo 3 de decembro. Ademais, suspendéronse todas as actividades previstas en VigoZoo estes días.
Por outra banda, o Goberno municipal abrirá a tarde desta sexta feira o pavillón do Carmen, o ximnasio e a piscina, así como a circulación na rúa do Carmen e no primeiro tramo de Cesáreo González, que se fecharon a pasada quinta feira debido ao temporal. A actividade nestas instalacións retómase tras intervir na cuberta das mesmas, aínda que quedan pendentes máis traballos que se realizarán "proximamente". Con todo, a actividade deportiva nas pistas de tenis de Samil quedou anulada.