A Xunta recorta unha media de tres profesionais de Atención Primaria cada mes

A situación da Atención Primaria (AP) na Galiza leva anos acumulando queixas e protestas de usuarias, usuarios e profesionais pola falta de medios e de persoal. A deterioración do servizo ten un dos seus exemplos na progresiva perda de médicas e médicos, unha redución ao que onte volveu pór número o Instituto Galego de Estatística (IGE), que publicou Recursos humanos en Atención Primaria 2023. O persoal médico de Atención Primaria descendeu en 2023 a 2.604 profesionais, o que se traduce en 39 menos que un ano antes. Cada mes que pasou, tres facultativos e facultativas menos. De feito, na AP galega non había tan poucas médicas e médicos desde hai seis anos, en 2018, cando eran 2.602, dúas menos que agora. Un repaso ás hemerotecas permite comprobar como había un consenso en considerar aquel número como máis que insuficiente. Camiño de se facer unha década desde aquela, a cifra apenas variou. SOS Sanidade Pública "ispe" as carencias da Atención Primaria ante o Parlamento En 2021 as médicas e médicos de familia eran 2.665, 22 máis que en 2022 e 61 máis que en 2023. Estes datos permiten comprender por que a Atención Primaria da Galiza é a máis saturada do Estado. Así o constata a memoria 2023 do Defensor do Paciente, que outorga á AP galega o primeiro posto no ránking de "saturación" no Estado español, posición que comparte con Andalucía. Advirte a entidade da necesidade de aumentar o seu cadro de persoal médico e pediatras en 30% para aminorar a presión, co que se podería "atender entre 20 e 25 pacientes ao día [por médico] en lugar de axendas con 50 ou 60". Este informe apuntaba que a Atención Primaria é "a gran debilidade do sistema sanitario" da Galiza. Pediatría A necesidade de reforzar Pediatría, que cita o Defensor do Paciente, despréndese tamén dos datos publicados onte polo IGE a respecto deste servizo. En 2023 había na Galiza 325 profesionais na AP, un número lixeiramente superior ao de exercicios anteriores (321 en 2022, 318 en 2021) mais claramente insuficiente para atender as necesidades existentes na Galiza actual. Ao redor de 200 concellos galegos non contan con servizo de Pediatría. O IGE rexistra como hai dúas décadas, en 2004, o número de pediatras era de 405, é dicir, 80 máis que na actualidade. Neste tempo (2004-2023), a perda de profesionais na Atención Primaria galega foi de 20%. A Atención Primaria carece de prazas de especialistas en Psicoloxía De pano de fondo destes datos, o infrafinanciamento da AP que apuntan sindicatos e plataformas de defensa da sanidade pública e corroboran diversos estudos e informes. En febreiro saía á luz o VI Informe sobre a Atención Primaria nas Comunidades Autónomas publicado pola Federación de Asociacións para a Defensa da Sanidade Pública (FADSP). Nel, a Galiza figura como o segundo territorio do Estado, só por detrás da Comunidade de Madrid, con menor porcentaxe de gasto sanitario público destinado á Atención Primaria en 2021, un 11,79% —a media entre todas as comunidades é de 14,17%—. O galego tamén é o segundo Goberno pola cola en investimento por habitante en Primaria, con 209,39 euros —243,16 euros no Estado—. Camas hospitalarias O IGE tamén publicou onte que os hospitais galegos contaban con 8.644 camas en funcionamento en 2022 -último ano analizado-, o que supón 15 menos que o ano anterior; e as camas instaladas en hospitais descenden a 9.712, 11 menos. Desde que hai rexistros nesta estatística (1999), o ano con maior número de camas en funcionamento foi 2004, cun total de 10.032. Neste período de tempo deixaron de estar operativas perto de 1.400 camas, unha de cada dez. A Xunta deixa o centro de saúde de Outeiro de Rei cunha médica das tres que ten asignadas De feito, hai 2,95 camas en funcionamento por cada 1.000 habitantes. A comezos de século XXI esta taxa era de 3,7 camas por 1.000 habitantes. A Galiza conta con 2.226 camas hospitalarias de xestión privada, segundo os datos achegados pola Fundación Instituto para o Desenvolvemento e Integración da Sanidade (Idis). As mesmas representan 22,8% do total do sistema sanitario galego e 4,5% das prazas privadas existentes no conxunto do Estado. A este respecto, só presenta unha porcentaxe máis elevada de camas hospitalarias neste réxime de titularidade Catalunya, con 39,2%, Madrid, con 13,6%, Andalucía, con 10,9%, e País Valencià, con 4,7%. A maior concentración de camas do sector privado dáse nos 14 hospitais de atención xeral, con 1.872. A maiores, os tres centros especializados en saúde mental e no tratamento das toxicomanías suman 228 e outras dúas dotacións sanitarias privadas engaden 166. Concertadas A Xunta da Galiza tiña concertadas no exercicio 2022 un total de 1.654 prazas hospitalarias cos operadores sanitarios privados. Neste sentido, 74,3% das camas dos hospitais privados do país están financiadas pola Administración galega, rexistrando unhas cifras superiores Madrid, con 81,2%; Andalucía, con 77,8%, e Catalunya, con case 78% MAPA | 85 concellos quedaron sen pediatra desde 2004 e xa son 194: cal é a situación no teu concello? Espera media de 103 días en traumatoloxía e de 177 en 'neuro' O Ministerio de Sanidade publicaba esta semana os datos de lista de espera a 31 de decembro de 2023 na Galiza, tanto cirúrxicas -45.027 persoas agardaban por unha operación- como para ver un especialista -212.282 galegos e galegas agardaban por unha consulta-. A publicación do Ministerio non ofrecía datos repartidos por áreas sanitarias, que si están dispoñíbeis con data a xuño de 2023. A trazos xerais, vese como hai tres áreas sanitarias que sobrepasan a media na Galiza de días de espera para se operar (66), e que son as de Santiago-Barbanza (78 días), A Coruña-Cee (74,3) e Ourense-Verín, con 68. Na área sanitaria da Coruña a maior agarda para ser intervido estaba no servizo de traumatoloxía (103 días de espera media) e de otorrino (82,6). Na de Santiago-Barbanza eran cirurxía pediátrica (121,5) e dermatoloxía (108) os que acumulan máis días de media de espera para ser operados. Na área sanitaria de Ourense-Verín, por exemplo, a agarda media en neuroloxía por unha intervención alóngase até 177 días. Na de Lugo-Viveiro-Monforte, e xa no que se refire á espera para ver un especialista, había que agardar 195 días para rehabilitación. Na de Ferrol, unha cita de consulta para o endocrino implicaba unha media de 110 días de agarda.