A área de Laza rexistra outros 20 movementos sísmicos en menos de 24 horas

A actividade sísmica de baixa intensidade continúa afectando o sureste da Galiza, en concreto á área de Laza, que, en menos de 24 horas, rexistrou outros 20 tremores, o máis importante de magnitude 3,2.

Segundo os datos de Instituto Xeográfico Nacional, desde o mediodía desta terza feira até a mañá da cuarta producíronse na área 20 movementos sísmicos, 17 deles en Laza, 1 en Sarreaus e 2 en Vilar de Barrio.

A área de Laza rexistrou ducias de pequenos tremores, 51 desde a pasada quinta feira

As intensidades destes últimos tremores oscilaron entre a magnitude 1,5 e os 3,2 graos. O de maior intensidade rexistrouse en Laza ás 23 horas da noite desta terza feira e chegou a sentirse noutros concellos, como Verín ou Cualedro.

ESta zona non deixou de tremer nos últimos días, nos que a área de Laza rexistrou ducias de pequenos tremores, 51 desde a pasada quinta feira, cando se rexistrou o primeiro movemento, de 2,8 graos, en Laza.

Os máis fortes tiveron lugar na noite da sexta e pouco antes das 17 horas do sábado, tamén en Laza, con magnitude 3,4, e deixáronse sentir en varios puntos do sur da provincia ourensá.