Adegas e viñedos Lareu, paixón polo viño

Galiza é país de viños, sen dúbida. Na práctica totalidade do territorio galego se producen viños dunha excelente calidade que gañan premios internacionais cada ano. A Denominación de Orixe (DO) da Ribeira Sacra non é unha excepción. Nela, concretamente nas ribeiras chantadesas da parroquia de Sabadelle, medran as uvas nas vides de Adegas e Viñedos Lareu. Unhas uvas que crecen nunha contorna inmellorábel á beira do Miño baixo unhas condicións climatolóxicas e ambientais excelentes para a produción dese xugo de uva que tanto se aprecia neste país. No que ten a ver coa historia lo lugar, crese que que coa chegada dos romanos chegou tamén unha máis prominente cultura do viño. Segundo a teoría máis plausíbel, entre o grupo de romanos que chegaron á zona que actualmente se coñece como 'Chantada', había un deles que recibía o nome de 'Sabbatus', que probabelmente lle deu nome á parroquia onde se asenta Adegas e Viñedos Lareu. Xa avanzando até a Idade Media, esta foi unha época de expansión dos viñedos, documentados desde o século XIII no meandro do Miño en que se encontran estas vides, aos que seguiron uns modos forais de explotación das terras "nas granxas" como microtopónimo que se mantén até a actualidade. A minuciosa intervención do ser humano no medio deu lugar ás terrazas escalonadas ou muras e posibilitou a viticultura, as mesmo tempo que creou a paisaxe peculiar tan característica da Ribeira Sacra. A contorna En Adegas e Viñedos Lareu, a contorna de castiñeiros e a ubicación semienterrada da propia adega proporciona as condicións idóneas de temperatura, repouso e silencio que contribúen a que os viños resalten as súas características máis específicas. Os viñedos repártense en tres fincas na ribeira dereita do Miño. Situadas a media ladeira e perfectamente orientadas ao mediodía, fan destes terreos pedregosos excepcionais zonas de cultivo. Cepas vellas con máis de 50 anos e modernas plantacións combínanse para lograr, en variedades como a mencía, unha maior calidade da uva. A historia de Primitivo Lareu O propietario de Adegas e Viñedos Lareu, Primitivo Lareu, atendeu Nós Diario para relatar como foron os inicios da súa andadura como produtor de viño. "Fíxenme cargo da adega por volta do ano 2.000 e comecei por cambiar as formas de traballar á hora de elaborar os viños. Decidín facer viños que tivesen algo máis e calidade porque a zona ten un potencial enorme", asegura Lareu a respecto dos seus inicios. Xa na actualidade e sobre o cultivo das vides, Lareu manifesta que "tentamos levar a cabo un cultivo que sexa o máis equilibrado posíbel. Só utilizamos abonos tradicionais, orgánicos e sen nada de químicos. Digamos que usamos un sistema que para nós é o máis equilibrado e tentamos manternos fieis á maniera de elaborar que viño que se tiña antes". O uso de animais nas viñas é algo que tamén caracteriza o maneira de traballar que se usa nesta adega. A este respecto, o propietarios das propias explica que "usamos animais para darlle vida ao solo. Entre os que usamos están ovellas galegas e ocas, así conseguimos que non nos veña maleza e que a vexetación espontánea non nos estorbe". Este uso de animais é beneficioso, de acordo con Lareu "non só porque manteñen as viñas limpas, senón porque abonan e manteñen a biodiversidade no espazo en que nos encontramos". Hai uns anos, Primitivo Lareu comezou a ponderar a idea do 'enoturismo'. Conseguir vivir de elaborar viño pode ser complicado e Lareu explica que, se for feito de maneira responsábel, pode "complementar a nosa actividade, sobre todo no relativo á promoción da adega". Así, comezaron a organizar actividades, por exemplo, durante as vendimas; deste modo a xente que estiver interesada podía ser partícipe da elaboración dun viño de gran calidade. Aposta pola mencía Sobre as diferentes variedades de uva que utilizan, Primitivo Lareu relata que na adega "apostamos claramente pola mencía xa que nos parece unha variedade moi adaptada á zona. O único problema é que a mencía está un pouco escasa de acidez, así que tamén estamos a tentar recuperar variedades máis antigas que se utilizaban anteriormente aquí nesta zona, como a brancellao ou sousón". A idea que defende Lareu é a de usar sempre variedades autóctonas galegas que se adapten á zona. Algo que non é traballo fácil xa que cada lugar da viña é todo un mundo: "Hai zonas en que pode dar máis o sol do que noutras e iso pode cambialo todo. É por iso que desde hai uns anos estamos traballando en ver que variedades se adaptan mellor a cada espazo". Isto conseguiría, segundo Lareu, resolver problemas que se dan na viña con variedades que son máis propensas a colleren certas enfermidades, algo que pode estar condicionado polo espazo en que están situadas. Outra consecuencia positiva deste traballo sería poder evitar tratamentos que se teñen que aplicar ás uvas por causa destas enfermidades, polo que, como se pode apreciar, este difícil traballo dá os seus froitos. En canto aos viños brancos, en Adegas e Viñedos Lareu fan unha aposta clara polo godello e a treixadura tradicional, non obstante, están a incorporar gradualmente a branca lexítima, unha variedade que na opinión de Lareu "é realmente marabillosa para elaborar viños moi aromáticos, moi interesantes". O futuro Adaptarse ou morrer, un dito que se revela certo en moitas circunstancias, tamén no mundo viño. Primitivo Lareu cre que é necesario "seguir a indagar en novas variedades, diferentes tipos de viños". Para el, a idea non é medrar en termos de cantidade de produción senón poder ofrecer unha moi boa calidade e unha ampla e diversa gama de viños. De feito, Lareu ten en mente sacar algún viño monovarietal novo nun futuro. En canto a proxectos máis inmediatos, a intención é "rematar as obras nun espazo novo de enoturismo para poder organizar máis actividades que vaian na liña de atraer xente". Ademais, Lareu planea poder utilizar ese espazo que están a crear como un lugar en que se poidan levar a cabo actos de índole cultural. Non hai dúbida, continuar a tradición vitivinícola tan propiamente galega é todo un mérito. Facelo, ademais, adaptándose á contorna e respectando a paisaxe e a herdanza de xeracións pasadas, fai de Adegas e Viñedos Lareu un lugar único, auténtico e moi recomendábel.