Activado o plan de alerta por inundacións en sete ríos galegos
Ademais, as concas do Lagares (Vigo) e do Sar (Compostela) atópanse baixo observación e en fase de prealerta
A Xunta activou a fase de alerta do Plan especial de inundacións da Galiza (Inungal) en sete ríos da Galiza por superar o nivel de desbordamento.
En concreto, segundo trasladou o 112, no último informe de Augas da Galiza indícase que superan este nivel os ríos Mera (Ortigueira), Rego das Mestas (Valdoviño), Mandeo (Aranga), Mendo (Betanzos), Tambre (Oroso), Dubra-Tambre (Val do Dubra) e Lérez (Pontevedra).
Ademais, as concas do Lagares (Vigo) e do Sar (Santiago) atópanse baixo observación e en fase de prealerta, aínda que, polo momento, non superaron os límites establecidos.
O 112 indicou que debido á situación meteorolóxica actual é posible que nas próximas horas máis ríos alcancen o nivel de desbordamento
Ante esta situación, a central de emerxencias recomenda a posta en marcha das medidas de auto protección necesarias e tamén a importancia de que a poboación aumente a precaución, sobre todo ao circular por vías ou pontes que se sitúan nas proximidades destes ríos, xa que unha subida repentina podería dificultar a situación e pór en risco ás persoas implicadas
Pola súa banda, Meteogalicia sinalou que esta fronte está a ser máis activo no noroeste, pero prevese que ao longo da mañá se desprace cara ao sur. Así, as acumulacións máis destacadas daranse na provincia de Pontevedra.
A Dirección Xeral de Emerxencias e Interior da Vicepresidencia Segunda da Xunta mantén activa unha alerta laranxa por choivas no suroeste da Coruña.
Segundo a Axencia Estatal de Meteoroloxía (Aemet), o fenómeno meteorolóxico adverso de nivel laranxa podería deixar unha precipitación acumulada en 12 horas que podería alcanzar os 80 mm.
A Aemet tamén activou o nivel amarelo por choivas no resto da provincia da Coruña e en toda a provincia de Pontevedra, así como no oeste e no sur da provincia de Ourense.