10 detidos nas comarcas de Lugo e de Lemos por manifestarse contra a presenza do equipo israelí na Volta

As primeiras detencións da xornada producíronse no concello do Corgo, na comarca de Lugo, atopándose actualmente detidos en dependencia policiais oito persoas.

Unha vez remata a etapa da Volta ciclista en Monforte, comarca de Lemos, reslutou detida a voceira municipal do BNG en Pantón e responsábel comarcal do BNG en Lemos, Rosana Prieto.

 

A responsábel de organización do BNG, Lucía López, sinalou que "desde o BNG orgullanos a resposta solidaria do pobo galego unha vez máis denunciando o xenocidio que Israel está a acometer na Palestina e denunciando a impunidade do Estado terrorista de Israel".

"As protestas que se están desenvolvendo na Galiza como na que participaba a nosa compañeira Rosana son lexítimas e plenamente pacíficas", asegurou López quen apuntou que "desde logo que non hai motivos para o uso da forza nin da represión".

Solidariedade do BNG coas persoas detidas

López aseverou que "non nos van calar e estamos orgullosas da nosa compañeira Rosana, que agardamos quede libre e sen cargos á maior brevidade". Neste sentido, o movemento de solidariedade con Palestina ten convocado novas protestas para a xornada de mañá.

Unhas ducias de persoas concéntranse neste momento ás portas das comisarias de Lugo de Monforte de Lemos, onde actualmente se atopan as persoas detidas.