O PSdeG esixe ao Concello de Santiago a documentación sobre os edís expulsados e a convocatoria do pleno
O secretario de Organización do PSdeG na Coruña, Diego Fernández López, exixiu ao Goberno local de Santiago que lle dea acceso a "todos e cada un dos expedientes" relacionados coa expulsión das edís Mila Castro, Mercedes Rosón, Gonzalo Muíños e Marta Álvarez e que proceda á convocatoria inmediata do pleno que ratificará a súa saída do Grupo Socialista e o pase a concelleiras non adscritas.
Nun escrito presentado esta quinta feira, ao que tivo acceso Europa Press, os socialistas lembran que o pasado 22 de abril rexistraron outro documento no que pedían que o Consistorio dese conta "por escrito" dos motivos polos que se excluíu da orde do día do pleno do 24 de abril a toma en consideración do paso a non adscritos das persoas expulsadas. Así mesmo, reclamaba que se procedese a reparar e emendar esta situación que consideran que "vulnera os dereitos fundamentais e constitucionais" do Partido Socialista.
No escrito asinado polo secretario de Organización do PSdeG provincial da Coruña, os socialistas sinalan que a Lei de Administracións públicas permite "coñecer, en calquera momento, o estado da tramitación dos procedementos nos que teñan condición de interesados", así como acceso aos documentos.
Ademais, apuntan que o prazo para emitir os informes xurídicos sobre a expulsión dos concelleiros xa finalizou, sen que o Partido Socialista recibira ningún dos documentos e lembran que a alcaldesa, Goretti Sanmartín, afirmou que convocaría un pleno extraordinario para abordar este asunto unha vez estivesen os citados informes.
Con todo, o PSdeG censura que a pesar de que o prazo para emitir estes documentos para os casos de todos os expulsados finalizou, o pleno para "emendar e reparar a vulneración de dereitos" que consideran que sofre a súa formación aínda non se convocou. Por todo iso, ademais de solicitar toda a documentación, os socialistas esixen a convocatoria inmediata do pleno extraordinario e que "non se continúe aumentando a súa situación de vulneración de dereitos fundamentais" con decisións "que prexudican os intereses" do PSOE.
O pleno, a próxima semana
Preguntada ao respecto, a alcaldesa da capital galega, Goretti Sanmartín, explicou esta quinta feira que o Goberno local traballa para convocar un pleno extraordinario no que abordar este asunto a próxima semana. A rexedora precisou que a intención do goberno local é aproveitar a convocatoria da sesión para levar a ela dous asuntos "importantes" para a cidade, como é o cadro de persoal e o inicio da ordenanza que fará realidade a taxa turística.
Para iso, indicou que os traballadores do Concello ultiman os detalles dos expedientes co obxectivo de que a sesión se poida convocar a próxima semana. "O día dependerá xustamente de poder completar eses dous expedientes que entendemos que son moi necesarios", afirmou.
Ademais, cuestionada sobre as peticións do PSdeG, a rexedora incidiu en que o Goberno local sempre actuou neste asunto "con total transparencia" e "cumprindo todos os prazos". "Este Goberno actuou en todo o proceso garantindo a imparcialidade e cumprindo punto por punto os informes das secretaría e esa é a liña que imos seguir", dixo. Tamén indicou que todos os membros da corporación poderán coñecer o contido dos informes e o ocorrido durante todo o proceso.
Por último e preguntada sobre se este asunto afectará os acordos que o goberno local alcanzaba cos seis concelleiros que integraban o Grupo Socialista, agora divididos, Sanmartín sostivo que "todas as persoas da corporación teñen que ser responsábeis" coa veciñanza e mostrouse convencida de que "as persoas que estiveron a dar apoio en temas fundamentais, como os orzamentos e outras cuestións, vano seguir facendo".
Con todo, recoñeceu que se deberá facer un "esforzo aínda maior de diálogo" na procura de "consenso". "Pero estou convencida de que, por responsabilidade política e sobre todo social cos cidadáns, as seis persoas vano seguir facendo", finalizou.