Substituír Tomé e salvar a crise, os retos de Besteiro en xaneiro

O PSdeG ten experiencia en convulsións internas. Desde a áspera 'desaparición' de escena en 2009 de Emilio Pérez Touriño após gañar o PP a Xunta da Galiza, o PSdeG pasou por catro liderados: Pachi Vázquez, Gonzalo Caballero, Valentín González Formoso e José Ramón Gómez Besteiro, este último en dúas etapas diferentes. Ningún deles logrou un liderado consolidado. Tampouco Besteiro, que se vén non tivo oposición notoria na súa volta á ponte de mando do PSdeG, ficou baixo a lupa de parte do partido a raíz dos males resultados as eleccións galegas de 2024. O 'caso Tomé' volveu axitar as augas internas do partido, con manifestos e manobras que axiña se achacaban a un ou outro sector. O propio ex presidente da Deputación de Lugo e alcalde de Monforte insinuou que todo resposta a unha conspiración onde el non sería a peza maior a cazar. Besteiro nega cara fóra que haxa "crise" no partido, mentres aspira a calmar as augas internas. A primeira cita importante é o día 10, no Comité Nacional do PSdeG, órgano máximo de dirección política entre Congresos. O 10 de xaneiro foi a data en que Xulio César cruzou o Rubicón para conquistar todo o poder en Roma. Non se prevé que no Comité Nacional haia un novo Xulio César. Na reunión trataranse os presuntos casos de acoso sexual e laboral denunciados na canle interna do PSOE, tanto o que implica a Tomé, como o do rexedor de Barbadás, Xosé Valcárcel, fóra do partido e que tamén conserva o posto de alcalde; e o de Inés Rei, alcaldesa da Coruña, denunciada canda o concelleiro Laxe Tuñas por dúas ex edís por acoso laboral. Do Comité, recoñecen fontes próximas ao aparato, ou sáese co compromiso de estañar feridas ou "a cousa pintará complicada", en palabras dun ex cargo socialista. Besteiro desbota a súa dimisión malia as crecentes críticas á xestión do caso Tomé: "Dimitir ten que dimitir o que acosa" A segunda cita importante para o PSdeG será pouco despois, o 14, coa escolla do novo presidente da Deputación de Lugo. Os socialistas queren conservar o bastón de mando mais para iso —ademais do BNG— o voto de Tomé é decisivo (mantén a acta de deputado), o que obriga a un xogo de equilibrios para elixir o seu sucesor. Barállanse tres nomes, dous deles da Mariña, Carmela López, alcaldesa de Burela e Fran Cajoto, alcalde de Foz. En ambas localidades Tomé perdeu en abril nas eleccións pola Secretaría Xeral do PSdeG fronte a Iván Castro. O terceiro nome é o de Pablo Rivera, colaborador de Tomé e concelleiro en Láncara (comarca de Sarria). O PSdeG, ademais, non pode permitirse perder o tempo. Ensarillarse en leas internas deixa todo o campo da oposición ao Goberno de Rueda ao BNG. A maiores, a actividade a medida que avancen os meses vai estar condicionada polas municipais de 2027 —máxime nun partido tan centrado no poder municipal— e no PSdeG esperan ter os candidatos das cidades para mediados deste ano. E a dirección do PSdeG quere chegar aí en situación de tranquilidade.