PP, PNV e Junts tomban a base legal do gravame temporal ás enerxéticas

O Pleno do Congreso dos Deputados aprobou esta quinta feira por maioría absoluta a derrogación do artigo legal no que se basea o gravame temporal ás empresas enerxéticas que se vén prorrogando desde 2023. Trátase dunha emenda á reforma fiscal que o PP introduciu no Senado coa súa maioría absoluta e que agora se ratificou no Congreso con apoio de Junts e do PNV, que xa non queren prorrogar o gravame.

En concreto, a medida estabelece a derrogación do artigo que regula a taxa na lei pola que se crearon os gravames temporais enerxético e de entidades de crédito e estabelecementos financeiros e de crédito e pola que se crea o tributo temporal de solidariedade das grandes fortunas.

Tanto o portavoz do PNV, Aitor Esteban, como a portavoz de Junts, Miriam Nogueras, confirmaron nos corredores do Congreso que as súas formacións non apoian esta figura do gravame porque pode pór en risco investimentos na industria enerxética e, no caso dos vascos, porque a súa configuración actual de prestación de carácter non tributario impide ás facendas forais recadala.

A derrogación impediría cumprir o seu compromiso con ERC, Bildu e BNG de prorrogar o gravame, pero o Goberno estatal pensa aproveitar o Consello de Ministros da próxima segunda feira, o último do ano, para aprobar o decreto lei prometido co fin de que entre en vigor antes de que a reforma votada esta quinta feira se publique no Boletín Oficial do Estado (BOE) e entre en vigor a supresión da súa base legal.

O escenario xa estaba previsto

Nas negociacións do Ministerio de Facenda con ERC, Bildu e BNG xa estaba previsto o escenario de PNV e Junts puidesen aliarse con PP e Vox para derrogar o gravame enerxético e tentar dificultar así a súa prórroga, segundo sosteñen as tres formacións.

"Era algo que tiñamos en mente, sabiamos que podía pasar", comentou o portavoz económico de EH Bildu, Oskar Matute. Neste contexto, o Goberno pactou coas tres formacións aprobar o decreto de prórroga no último Consello de Ministros do ano, que será a quinta feira, para que entre en vigor antes da derrogación.

Pola súa banda, a vicepresidenta primeira e ministra de Facenda, María Jesús Montero, aseverou que ese decreto aprobarase para dar cumprimento ao acordo cos seus socios. "Traerémolo, aprobarémolo", dixo nos corredores do Congreso.

Validarase?

Como todo decreto lei, a prórroga do gravame das enerxéticas terá que someterse a debate no Pleno do Congreso no prazo de 30 días para a súa validación e derrogación, e aí é onde o Goberno español non ten garantidos os seus apoios dada a negativa de PNV e Junts.

Por iso, Facenda pensa ofrecer que o decreto se tramite despois como proxecto de lei para así transformar o gravame nun imposto permanente e convencer Podemos, que rexeita a temporalidade, e o PNV, que ao tributo non se opón porque a súa xestión correspondería ás facendas forais vascas e navarra.