O PP defende en Euskadi e Catalunya a Policía propia que lle nega á Galiza

Responsábeis do Partido Popular nos Parlamentos de Euskadi e Catalunya defenden os seus corpos policiais propios e mesmo avogan por incrementar os seus efectivos e competencias. Porén, na Galiza o PP vén de retroceder 20 anos –en 2005 a Xunta gobernada por Manuel Fraga asinou a Lei para crear unha Policía galega, ratificada polo Parlamento en 2007– e esta mesma semana a secretaria xeral do PP galego, Paula Prado, acusaba o BNG de “querer ir cara á independencia” por reclamar na Cámara a creación dunha Policía galega e a transferencia das competencias de Tráfico, que o propio Fraga avalaba hai vinte anos. A portavoz de seguridade do PP no Parlamento vasco, Ainhoa Domaica, defende, en conversa con Nós Diario, o corpo policial propio –a Ertzaintza– que Euskadi ten despregado desde 1982. Domaica falou a este xornal dun corpo policial propio “querido pola cidadanía, que o asume con naturalidade” e mesmo reprochou ao Goberno vasco (PNV-PSE) que só en 2011 cumprira co obxectivo de que este corpo conte con 8.000 axentes na súa Relación de Postos de Traballo (RPT). Domaica mesmo demanda desde o PP “máis medios e máis formación” para os ertzainas e destaca a “boa relación e colaboración” que en Euskadi existe entre a policía propia e as Forzas e Corpos de Seguridade do Estado. 20 anos dun consenso sobre competencias de Tráfico e Policía galega que o PP de Rueda rachou no Parlamento Euskadi tamén ten transferidas á Ertzaintza as competencias en materia de Tráfico, mesmo contan cunha Xefatura de Tráfico propia, e o PP vasco demanda un incremento de efectivos para atender as novas competencias da Policía vasca como a de portos e aeroportos, recentemente transferida á Ertzaintza. No mesmo senso, en declaracións a Nós Diario, pronúnciase o voceiro de Interior do PP no Parlamento catalán, Alberto Villagrasa. Defende que os mossos “son grandes profesionais” malia que critica o “intento de politizalos durante o procés”. Tamén o PP catalán considera que os efectivos actuais da Policía propia “son insuficientes” e mesmo critican que para asumir novas competencias como portos e aeroportos, “non están ben dimensionados”, e aseguran que farían falta “4.000 axentes máis” para asumir novas competencias. Os catro corpos policiais propios do Estado No Estado español hai catro territorios que despregaron nos últimos corenta anos -en distintas datas- as súas propias policías: Catalunya, Euskadi, Nafarroa e Canarias. A Policía Foral de Nafarroa existe desde 1928, aínda que foi reorganizándose e mudando de nome e competencias ao longo dos anos até a Lei Foral de Corpos de Policía de Nafarroa. Ten máis de 1.000 efectivos na actualidade. No caso dos Mossos d'Esquadra o seu despregue comezou en 1994, en 2023 este corpo policial catalán alcanzou os 18.355 efectivos e a Comisión Bilateral entre o Estado de Catalunya acaba de acordar este mesmo mes a ampliación dos efectivos dos Mossos a 25.000 até 2030. A Ertzaintza crece de maneira organizada desde 1982, despregándose progresivamente por toda a xeografía vasca para chegar en 1995 a responsabilizarse da totalidade do territorio, substituíndo os diferentes corpos de policía estatais. Euskadi prepara os ertzainas na Academia de Policía do País Vasco, en Arkaute. As Illas Canarias teñen un corpo policial de seu Nas Canarias desde 2010 está despregado o Corpo Xeral da Policía Canaria, que comezou con algo menos de 100 axentes e que nestes anos ten aumentado os seus efectivos até superar os 300 axentes. A Academia Canaria de Seguridade forma a este corpo policial co obxectivo de alcanzar os 1.700 efectivos Pola contra, Galiza non ten Policía propia. O Estatuto de Autonomía de 1981 fixa no seu artigo 27.25 como competencia exclusiva da Galiza “a creación dunha Policía Autónoma de acordo co que dispón a Lei Orgánica prevista no artigo 149. 1.29 da Constitución”. Porén, transcorridos os anos, o Goberno galego non conta cunha forza de Policía propia, senón cunha unidade do Corpo Nacional de Policía española adscrita á Comunidade Autónoma galega, que depende organicamente da Dirección Xeral da Policía do Ministerio do Interior.