O PP critica a UDC por izar a bandeira palestina e non a española, obviando o xenocidio
O portavoz do PP no Parlamento galego, Alberto Pazos Couñago, cualificou esta sexta feira de "grave ataque ao respecto institucional" o izado da bandeira palestina e da galega na praza do Reitorado da Universidade da Coruña (UDC) e non a española. "É unha acción premeditada que busca a confrontación", asegurou, en declaracións aos medios, ao recalcar que "hai unha bandeira de España que podería acompañar a galega" e denunciar que non se deben "utilizar reivindicacións, por xustas que sexan, para montar un pequeno lío".
Pola súa parte, nun comunicado, a UDC explica que se traba dun acto "simbólico, de apoio ao pobo palestino e de rexeitamento ao que está sufrindo". Aclara, ademais, que nos mastros da praza do Reitorado "normalmente non ondean bandeiras", senón que están para "pólas cando a ocasión o require". "Non se retirou ningunha bandeira, nin se substituíu ningunha bandeira", insiste a Universidade.
Ao lado da bandeira de Palestina, engade o texto, "púxose a da UDC e, toda vez que había outro mastro, e que estamos na Galiza, púxose a da Galiza". Indica, así, que "non houbo máis consideración que esa". "Tratouse dun acto simbólico e solidario, sen máis intencionalidade", conclúe a institución.
"Insidias e mentiras"
Pondo como exemplo esta campaña do PP "contra a UDC e o seu reitor", a viceportavoz primeira do BNG no Parlamento galego, Olalla Rodil, pediu ao partido que dirixe Alfonso Rueda que free "a campaña de difamacións" con "insidias, mentiras e ataques" contra organismos, institucións e persoas que son críticas coa súa acción de goberno ou que "non controla politicamente".
"Estamos vendo o PP máis desataco ca nunca, lanzando ataques contra todo e contra todos, sen respectar xa nada nin a ninguén", criticou Rodil. Para a deputada nacionalista, isto "demostra" que no PP están "moi nerviosos" polo "ascenso do BNG".
Contra a CIG-Ensino
O PP tamén dirixiu esta semana as súas críticas contra a CIG-Ensino, por un material didáctico –que non era da autoría da central sindical– polo que a secretaria xeral do PP galego, Paula Prado, acusou o BNG de "querer adoutrinar nos colexios" a través do sindicato.