Pedro Sánchez anuncia dez compromisos para enfrontar o cambio climático: estas son as claves da proposta de Pacto de Estado

O presidente do Goberno español, Pedro Sánchez, anunciou que o Consello de Ministros e Ministras aprobará esta terza feira o Pacto de Estado contra o Cambio Climático, "unha folla de ruta" con dez compromisos das administracións públicas, entre os que destaca un aumento dos medios para a loita contra os incendios forestais e o seu mantemento durante os 365 días do ano.

Así o avanzou Sánchez durante a súa intervención no acto 'Por un pacto de Estado fronte á emerxencia climática', no que previamente interviñeron a vicepresidenta terceira e ministra para a Transición Ecolóxica e o Reto Demográfico, Sara Aagesen; o ministro do Interior, Fernando Grande-Marlaska, e o ministro de Agricultura, Pesca e Alimentación, Luis Planas.

Entre os dez compromisos destacados polo xefe do Executivo estatal atópase tamén a creación de fondos con recursos permanentes que sirvan para a reconstrución; a creación dunha Axencia Estatal de Protección Civil; o despregamento dunha Estratexia de Resiliencia Hidráulica; a adaptación da lexislación e o territorio a unhas temperaturas máis severas; a creación, desde a público, dunha ampla rede de refuxios climáticos, o recoñecemento e potenciación do papel do mundo rural, e a instauración dunha cultura cívica de prevención ante emerxencias.

Así, Sánchez detallou que o primeiro compromiso incluído no Pacto de Estado é o de crear fondos con recursos permanentes, tanto a nivel estatal como tamén a nivel autonómico, "que sirvan para acelerar a reconstrución e a recuperación dos municipios e das paisaxes golpeadas por estes eventos climáticos".

A segunda medida é que todas as administracións se comprometan a aumentar e a manter ao longo dos 365 días do ano todos os medios técnicos e humanos necesarios para previr e para combater os eventos climáticos extremos. "Isto significa contar con corpos de bombeiros, de brigadistas, de axentes forestais estábeis, formados, dotados dos vehículos e das tecnoloxías adecuadas", puntualizou Sánchez.

"As xestións, máis eficaces desde o punto de vista descentralizado"

Para reforzar a coordinación e cooperación entre administracións, o Goberno español quere crear a Axencia Estatal de Protección Civil e de Emerxencias que "potencie e garanta o bo funcionamento do sistema". "As xestións de emerxencias son máis eficaces desde o punto de vista descentralizado que centralizado", asegurou.

Sánchez tamén incidiu na necesidade de "avanzar cara a un modelo de xestión forestal adaptado ás realidades sociais, económicas e climáticas do século XXI". "Debemos promover a reforestación con bosques mixtos, con especies resilientes ao lume, con tratamentos, por exemplo, silvícolas preventivos, co aproveitamento sostíbel dos recursos forestais", argumentou.

A quinta medida recolle despregar unha Estratexia de Resiliencia Hídrica destinada a aumentar a capacidade dos municipios para lidar contra as inundacións e as secas, mentres que a sexta fai referencia á creación dunha "ampla rede" de refuxios climáticos en coordinación con autonomías e concellos.

O pacto de Estado tamén inclúe recoñecer e potenciar o "papel esencial" do mundo rural, fomentando o aproveitamento agroforestal, a gandaría extensiva, a agricultura rexenerativa, o pastoreo dirixido ou a rega eficiente; así como instaurar unha cultura cívica de prevención, protección e reacción ante emerxencias da man da comunidade educativa e esixir á Unión Europea "maior ambición" respecto á Transición Ecolóxica.

"Facer o que faga falta para que a traxedia non volva a repetirse"

En clausura do acto de apertura do curso político do Goberno español, Sánchez apostou por "facer o que faga falta" para que esta traxedia polos incendios forestais "non volva repetirse".

Neste punto, identificou os tres factores "fundamentais" que causaron esta traxedia: "Unha política de prevención de incendios claramente insuficiente, unha xestión do territorio inadecuada e unha emerxencia climática que fixo que os incendios sexan agora máis virulentos".

Sánchez estivo arroupado pola maioría dos ministros e ministras, así como por membros da Administración estatal como a directora xeral de Protección Civil, Virginia Barcones; o coordinador do Centro de Coordinación de Alertas e Emerxencias Sanitarias, Fernando Simón; o director xeneral de Tráfico, Pere Navarro, ou a presidenta do Consello Superior de Investigacións Científicas, Eloísa del Pino, entre outros.

Para achandar o camiño ao Pacto de Estado, o presidente do Goberno español creou unha Comisión Interministerial para o Cambio Climático e a Transición Enerxética, que mantivo a súa primeira reunión no Complexo da Moncloa antes do último Consello de Ministros e Ministras a pasada terza feira.

A Comisión Interministerial para o Cambio Climático e a Transición Enerxética púxose en marcha co fin de lograr o mellor tratamento das políticas públicas en materia de transición cara a un modelo produtivo e social máis ecolóxico, salientou Sánchez.

Aagesen: "Unha resposta unida ao maior reto, o cambio climático"

A ministra Sara Aagesen abriu o acto advertindo da "urxencia de dar unha resposta unida ao maior reto, o cambio climático" e fixo referencia a un mes de agosto "especialmente complexo" que deixa sinais "indiscutíbeis e preocupantes".

"Un verán onde os incendios arrasaron o noso país e tamén vivimos unha intensa vaga de calor", lembrou Aagesen, destacando que esta foi "a máis intensa rexistrada, cunha anomalía de 4,6 graos" e que os incendios queimaron até o 25 de agosto "máis de 350.000 hectáreas", segundo as estimacións do Ministerio. "Falamos outra vez doutro récord de superficie afectada, a maior nas dúas últimas décadas", sinalou.

Aagesen incidiu a necesidade de "un compromiso que transcenda lexislaturas". "Por iso hoxe empezamos este camiño aberto a propostas, ao talento colectivo da nosa sociedade, para construír un pacto tan importante e tan necesario fronte á emerxencia climática", comentou.

Pola súa parte, Planas defendeu que a loita contra os efectos do cambio climático "só será posíbel da man de agricultores, de gandeiros e de silvicultores". "Algúns se obstinan en ver a transición ecolóxica como unha realidade contraria aos intereses dos profesionais do campo. Mais é exactamente ao revés e quéroo dicir alto e claro", resolveu o ministro, á vez que enumerou os "tres aspectos clave" na adaptación ao cambio climático, que segundo el son auga, cultivos e xestión de riscos.

Para o responsábel de Agricultura, Pesca e Alimentación, "unha boa dotación orzamentaria é fundamental" para abordar a emerxencia climática. "Para agricultores, para gandeiros, para o medio rural, mais tamén para manter a súa vida e a súa actividade económica. A seguridade europea é tamén a seguridade alimentaria e, por iso, temos que traballar niso. De aí a necesidade dun pacto de Estado", dixo.

Na mesma liña, o ministro do Interior asegurou que o cambio climático "é unha evidencia científica que non admite discusión" e que "aumenta de maneira exponencial a virulencia de catástrofes e emerxencias, acelera a súa frecuencia, prolonga a duración dos episodios e multiplica as súas consecuencias lesivas".

"Construímos un Sistema de Protección Civil robusto, coherente e eficiente, mais, sen ningunha dúbida, enfrontámonos a un novo paradigma, o da emerxencia climática, que nos exixe un paso adiante para dotarnos de novas respostas", concluíu Marlaska.