Nacións Unidas exixe á UE que protexa as linguas minorizadas

Os Procedementos Especiais do Consello de Dereitos Humanos das Nacións Unidas acolleron esta cuarta feira, 28 de xaneiro, en Bruxelas a visita de Nicolas Levrat, relator especial da ONU sobre Cuestións de Minorías, que concluíu que a Unión Europea debe buscar maneiras máis eficaces co fin de protexer os dereitos das minorías -tamén lingüísticas- dentro das súas fronteiras. "A Unión Europea defende os dereitos de minorías fóra das súas fronteiras, especialmente a través da súa política de ampliación, mais carece das ferramentas e motivacións para abordar eficazmente asuntos de minoría da dirección dentro do bloque. Este baleiro ten que ser fechado para garantir unha protección mellor de minorías dentro da UE", sinalou Nicolas Levrat, quen engadiu que "o respecto dos dereitos humanos pertencentes a minorías é un dos valores fundamentais dentro do organismo europeo".

O experto sinalou que a Comisión "non recoñece unha competencia da UE neste eido, e por tanto adoptar leis nin medidas", e propuxo unha serie de alternativas para facer fronte a este desafío e dar esa protección aos colectivos minoritarios: "Como alternativa, a UE debería promover un enfoque que obrigue aos Estados membros a respectar este valor fundamental", destacou.  Con todo, eloxiou o enfoque antidiscriminatorio e tamén instou a Comisión Europea a adoptar un marco máis integral para os dereitos das minorías. "Isto garantiría un enfoque máis coherente das cuestións relacionadas coas minorías en toda a UE e atendería as necesidades das minorías lingüísticas, que actualmente quedan fóra das estratexias e políticas da UE", afirmou.

Aliás, acolleu con satisfacción o apoio financeiro a iniciativas da sociedade civil centradas nas minorías en terceiros países e alentou a que este enfoque se aplique tamén aos actores da sociedade civil dentro da UE. Se ben é certo que Levrat celebrou este investimento, tamén mostrou unha preocupación pola falta de diversidade entre o persoal da UE. Sinalou que, a pesar dos esforzos recentes para tratar esta cuestión, as minorías —especialmente as minorías racializadas e étnicas— seguen estando gravemente subrepresentadas nas institucións, órganos e axencias da UE. "O persoal da UE dista moito de ser representativo da diversidade existente na Unión", declarou Levrat en rolda de prensa.