A Fegamp pide un órgano permanente coa Xunta que vele polas competencias

A Federación Galega de Municipios e Provincias (Fegamp) propón crear, a través da lei de medidas que acompaña aos Orzamentos autonómicos para 2025, un órgano "permanente" e "de carácter paritario", no que tamén estea representada a Xunta da Galiza, para "garantir o respecto á autonomía e competencias locais".

É unha das propostas que aprobou esta quinta feira a comisión executiva extraordinaria do ente municipalista e que xa remitiu aos grupos parlamentarios (PP, BNG, PSdeG e Democracia Ourensá), para que os inclúan entre as súas emendas ás contas para 2025, que están en plena tramitación parlamentaria e que se debaterán a segunda feira vindeira. 

O novo órgano, afirma a Fegamp, serviría para "garantir" a autonomía municipal nos procesos de elaboración normativa, así como na xestión e planificación das políticas públicas, especialmente aquelas que chama "de competencia compartida", como servizos sociais, augas, portos, tratamento de residuos e policías locais. 

Así mesmo, insta á Xunta a "potenciar as funcións" da Comisión Galega de Cooperación Local e a convocala de forma "periódica e regular", e antes de aprobar os Orzamentos e as normas que de réxime local. 

Así mesmo, nas emendas inclúese, entre outros, un aumento do Fondo de Cooperación Local (FCL) e que a repartición de recursos con cargo ao mesmo sexa todo "incondicionado" e que se distribúa atendendo á "poboación, superficie, núcleos de poboación e porcentaxe de maiores de 65 anos".

Ademais, en políticas sociais, reclama que a Xunta e o Estado asuman "anualmente" o "custo íntegro" do Servizo de Axuda non Fogar (SAF) e pide un incremento da partida de sanidade para drogodependencia.