Cesado nas súas funcións de Goberno un concelleiro ‘tránsfuga’ de Viana do Bolo
"A sentenza do Tribunal Supremo declara que os concelleiros tránsfugas non poden asumir novos cargos e retribucións que supoñan melloras políticas ou económicas", indica o BNG.
Santiago Barja foi cesado nas súas función de Goberno no Executivo local de Viana do Bolo saído da moción de censura para desbancar o nacionalista Secundino Fernández, segundo vén de informar o BNG desta localidade.
“O BNG vén de recoller a resolución de cese como 2º tenente alcalde, como membro da xunta de goberno local e nas súas función de concelleiro delegado de política rural de Santiago Barja Barja. Lembrar que Santiago Barja é concelleiro non adscrito tránsfuga, un dos que traizoaron o votado polas veciñas e veciños de Viana do Bolo”, indica o BNG.
“Naquel pleno celebrado o pasado 1 de setembro os votos do PP de Andrés Montesinos e dous tránsfugas do PSOE apartaron antidemocraticamente, da alcaldía Secundino Fernández Fernández traizoando a vontade dos veciños e veciñas de Viana do Bolo”.
A sentenza da Sección Cuarta da Sala do Contencioso-administrativo do Tribunal Supremo indica que o pase a concelleiro non adscrito “impide que se asuman cargos ou perciban retribucións que antes non exercían ou percibían e que impliquen melloras persoais, políticas ou económicas”.
En base a esta Sentenza, e pola que é cesado este concelleiro.
“No BNG congratulámonos de que o Tribunal nos dea a razón e recoñeza o carácter antidemocrático e contrario a dereito dunha moción de censura que levou á alcaldía a un tránsfuga en contra da vontade da veciñanza de Viana do Bolo”.