Carmela Silva: "Temos unha Xunta escapista que deriva competencias aos concellos"

A Deputación de Pontevedra está actualmente centrada na resposta á crise da Covid-19. Que destaca das medidas postas en marcha polo seu Goberno? Desde o primeiro momento, tivemos a conciencia de que estabamos nun contexto excepcional, seguramente ante a crise máis grave dos últimos cen anos, non só no que respecta á saúde, senón a todas as súas consecuencias. Aínda que somos unha administración que ten como primeiro obxectivo garantir dereitos e servizos nos concellos de menos de 20.000 habitantes, intentamos dar resposta a todas as consecuencias que xeraba esta pandemia, en primeiro lugar, as internas. Refixemos toda a estrutura administrativa para garantir a saúde das traballadoras e traballadores espallados por toda a provincia. Como tamén xestionamos os ingresos dos concellos de menos de 50.000 habitantes e eramos moi conscientes da necesidade de liquidez, inmediatamente adiantamos eses recursos. Ademais, estabamos moi preocupadas coa situación das mulleres, pois sabiamos que as consecuencias da Covid ían afectarnos moito máis. Os coidados eran o centro de todo e tratamos de transmitir que non podían recaer só nas mans das mulleres. Fixemos unha campaña moi potente sobre corresponsabilidade e habilitamos axudas a concellos de menos de 20.000 habitantes para que puidesen pór en marcha medidas de corresponsabilidade. Fixemos modificacións orzamentarias para que os concellos de menos de 20.000 habitantes puidesen ter recursos para as prestacións sociais. Tamén fomos quen distribuímos de forma inmediata o material de protección que forneceu o Goberno estatal. Atendemos a necesidade de desinfección de espazos públicos de concellos co noso consorcio de bombeiros; fixemos un esforzo para que a cultura seguise chegando aos concellos, reforzamos as políticas de igualdade... Asumindo competencias que lles eran impropias. Cada administración ten que facer fronte ás súas competencias, cousa que non acontece, pois temos unha Xunta escapista, que ten competencias, recursos ordinarios e que está recibindo centos de millóns de extraordinarios a través do Goberno estatal, dos fondos que chegan da UE. Aínda así, deriva competencias de forma continuada aos concellos. Iso si, os concellos non reciben nin un só euro máis. Pretenden que sexa o mundo local, que recibiu cero euros, quen poña os cartos. É todo moi escandaloso, pois os concellos estiveron ao pé do canón desde o minuto cero sen ter máis recursos. Un dos sectores máis afectados pola pandemia é o do comercio e o da hostalaría. Desde a Deputación consideraron insuficiente a resposta da Xunta e lanzaron a proposta de dedicar o 1% do orzamento ao sector. En que estado se atopa a implementación desta medida? Entendiamos que era a Xunta a que debía aprobar un plan potente de recursos para os sectores máis afectados, mais o Goberno galego intentou pór no tellado do mundo local esas axudas, debatemos moito con eles e, entendendo que a situación é especial, propuxemos que cada administración achegase o 1% do seu orzamento. Xa o aprobamos a mediados de febreiro e agora os concellos teñen á súa disposición ese 1% do orzamento. Enviamos até sete cartas a Feixoo para que nos convocasen a unha reunión sobre as medidas a tomar e para coordinarnos, mais non recibimos ningunha resposta. Agora é o momento de pór enriba da mesa un plan económico potente e estamos traballando niso. Ten que haber unha modificación do financiamento local da man do autonómico. Se se muda o financiamento autonómico, ten que mudarse o local e as comunidades teñen que estar obrigadas a facer un traslado de recursos con criterios obxectivos, como facemos as tres Deputacións [Pontevedra, A Coruña e Lugo] co Plan concellos, onde distribuímos o diñeiro seguindo uns criterios obxectivos. Hai unhas semanas, coñeciamos a sentenza que condenaba o seu antecesor no cargo, Rafael Louzán. Sorprendeulle a resolución xudicial? Non me sorprendeu nin a min nin sorprendeu a ninguén. As formas de funcionamento desta Administración durante os 12 anos de Goberno de Louzán deixaron moito que desexar, mais eu, cando considero que hai unha forma de gobernar con visos de corrupción, denúncioa e unha vez que está en mans xudiciais, non fago de xuíza, niso tamén me diferencio do PP. Eu son Executivo. Creo na división de poderes. Sorprendeume que outras cuestións con múltiples irregularidades non chegasen a ser axuizadas. A Deputación de Pontevedra desenvolve un programa moi activo en materia de igualdade, cun compromiso persoal moi intenso. É socialista a forza de ser feminista? Son socialista porque primeiro son feminista, non entendo o socialismo sen o principio básico, que é a igualdade. Somos o 52% da poboación e se ti queres construír unha sociedade xusta tes que traballar para que a metade da poboación deixe de vivir en discriminación. É moi importante que cheguen mulleres aos postos de decisión, mais non é suficiente. Cando elas chegan, teñen que facer chegar a todas as mulleres e, nese sentido, as políticas de igualdade deben ser ser o eixo transversal de todo. As políticas de igualdade teñen que ser transversais e as mulleres temos que ser impulsoras do cambio. Nesta administración, isto é unha realidade innegábel e absolutamente todo o Goberno impulsa a igualdade. O PSdeG vigués é un modelo de éxito en termos electorais. Hai que exportar esa maneira de facer ao resto da Galiza? É unha evidencia. Falamos dun modelo moi ligado ao territorio e á xente. Nesta provincia, en cada un dos concellos onde gobernamos, hai unha política baseada nas demandas das cidadanía, dos colectivos e do asociacionismo, e na escoita activa, cun discurso político claro. A xente ten que identificarte coas transformacións que queres realizar. Hai que facer un enorme traballo de análise do que acontece e de como hai que responder. É a base da democracia: escoitar e integrar nas políticas os proxectos de talento que veñen de fóra. Non podes estar fechada no despacho crendo que o sabes todo, pois a maioría das ideas están fóra. Vese outra lexislatura máis á fronte da Deputación ou non descarta asumir novas responsabilidades, como unha candidatura á presidencia da Xunta? Esta provincia precisa aínda dun tempo para poder dicir que chegamos á transformación que en 2015 nos propuxemos BNG e PSdeG. Queremos vilas amábeis, estamos facendo unha transformación dos principios de mobilidade alternativa, de tratamento residuos e de respecto ao medio ambiente e queda moito por avanzar para conquirir ser referencia en igualdade. Temos que facer un enorme esforzo polo rural, para que teña servizos e dereitos, e para poder rachar coa sangría demográfica. Precisamos rematar este mandato e estar un máis. Eu en política non podía soñar estar en todos os lugares en que estiven: número 2 da cidade máis importante, sendo concelleira de Urbanismo, Economía, Facenda, Patrimonio... primeira portavoz dun grupo parlamentar no Senado, presidenta dunha Deputación, secretaria segunda no Congreso, membro da Executiva Federal, agora do Comité Federal... a miña traxectoria política está cuberta. É o momento de que persoas novas, particularmente mulleres, gañen o peso que se precisa para converterte nunha líder. A min xa non me toca. A nivel orgánico, non estou en ningunha batalla nin vou estar. Quero centrarme en demostrar que se pode gobernar doutra forma, como fai este Executivo de coalición entre PSOE e BNG.