Ana Mosquera: "En Venezuela hai unha revolución e iso molesta"

Acaba de chegar de Venezuela, país que coñece ben, por ter vivido alí. Como viu a situación da comunidade galega emigrada e cal é o seu estado de opinión? Hai galegos e galegas chavistas, incluso houbo ministros, pero creo que son unha minoría que case sempre proceden de familias cunha certa tradición política. A realidade é que a maioría dos galegos e das galegas emigraron en pleno franquismo, cando xa se esqueceran os valores da República, sen formación e sen memoria. Chegaron a un país moi rico no que vivían ben. Viviron de costas e con medo aos milleiros de venezolanos pobres que moraban en moitas ocasións nos cerros, en casas de lata e cos que poucas veces se cruzaban. Que o chavismo chegara ao poder dándolle preferencia a esa xente non o entenderon e iso fixo que a tremenda propaganda antichavista os penetrase profundamente. En 2001, un familiar meu díxome: “Isto é unha ditadura”. Eu contesteille: “Pero Chávez ganou varias eleccións”. A súa resposta foi: “Si, claro, pero iso é porque o votan os dos ranchitos”. A información que chega dos grandes medios é dunha sociedade moi confrontada, con problemas económicos e graves déficits democráticos. Un día chamoume unha amiga a Caracas: “Está que arde por aí”, dixo, e eu mandeille un vídeo do Bulevar de Sabana Grande [municipio Libertador, Caracas], pola noite, cheo de xente e música. A seguridade das rúas é grande neste momento, algo que moitos venezolanos nunca viran antes. Hai moito movemento económico. É un país creativo onde é fácil vivir con pequenos negocios. O bolívar volve estar presente con forza. Aínda non se recuperaron os salarios, sobre todo dos traballadores públicos, compénsase con bonos, a CLAP, unha sorte de cesto de alimentos e produtos subvencionados. Participou como observadora nos recentes comicios que outorgaron unha nova vitoria a Maduro e que desde sectores da oposición, pero tamén da comunidade internacional, son considerados como unha fraude, cal é a súa visión? En Venezuela hai unha revolución e iso molesta, polo petróleo e polo exemplo que supón para outros países. Venezuela é hoxe moito máis democrática que antes de Chávez. Eu estiven tamén nunha consulta popular nas comunas. Os membros da comunidade decidían en que investir o diñeiro. Lembroume a organización que había nas nosas aldeas para coidar o patrimonio comunitario. Nunha comunidade agrícola que visitei, mercaran unha máquina escavadora para aliviar as medras do río que inundaban as casas e colleitas. Isto abarata os custos e fai que a propia comunidade coide máis o proxecto. Que supón politicamente a marcha de Edmundo González? Iso curiosamente é algo do que se fala moito máis aquí que en Venezuela. A oposición non ten interese en falar dese tema, están moi divididos. Onde viva González, non importa. Hai unha elite que agora lidera Corina Machado e que vai pedir sancións para afogar a economía e así conseguir volver ao poder. Esa xente considera que Venezuela é a da súa propiedade. A inmigración venezolana na Galiza é moi importante. Politicamente é unha realidade homoxénea ou plural? Os últimos en chegar son emigrantes económicos cun baixo perfil político. Durante os primeiros anos do bloqueo, Venezuela viu reducidos en 90% os seus ingresos e non se podían adquirir certos medicamentos. Ese bloqueo custou vidas e tamén vidas de galegos que estaban aló. Un 'crowdfunding' para matar Maduro Venezuela é a segunda patria de Ana Mosquera, que coñece a fondo a realidade dese país. Nesta liña, apunta que “chama a atención que desde aquí se fale de represión, pero estiven cunha familia nun barrio antichavista e fecharon a fiestra para falar ben do Goberno. Nalgúns barrios, aos dirixentes chavistas marcáronlle a casa, e iso podédelo ver na rede X, venezolanos opositores que sinalan enderezos para 'facerlles unha visita educada', din eles”. Na mesma dirección, Mosquera sinala que “o que ocorre é que esta xente non actúa por si, están acostumados a pagar para que lles fagan os traballos. De feito, o último gran escándalo, do que aquí por certo non se fala, é que certos opositores están facendo nas redes sociais un 'crowdfunding' para pagar o exército mercenario de Erik Prince para asasinar o presidente venezolano Nicolás Maduro”.