As Alcaldías de 69 concellos galegos, pendentes dun acordo entre o BNG e o PSdeG

As conversas para conformar o Goberno municipal de Compostela arrancan hoxe. O BNG acode á cita co obxectivo de sumar o PSdeG ao proxecto que liderará na cidade nos próximos catro anos a nacionalista Goretti Sanmartín e buscar puntos de acordo para articular un Executivo estábel. Pola súa parte, a formación socialista xa mostrou a súa disposición a apoiar como alcaldesa a candidata do BNG, pero discrepan sobre a súa entrada ou non no Goberno. As lóxicas internas do PSdeG en Compostela están marcando estes primeiros momentos da negociación. Nisto incide a tradicional división da formación na cidade, cun sector aglutinado arredor do alcalde en funcións, Xosé Sánchez Bugallo, e outro ligado á concelleira Mercedes Rosón. Así e todo, o proceso continúa aberto na agrupación socialista compostelá, que adoptará un acordo definitivo en función da marcha das conversas. Goretti Sanmartín será alcaldesa de Compostela Compostela Aberta, a outra peza do quebracabezas da gobernabilidade na capital da Galiza, xa expresou a súa disposición a apoiar a investidura de Goretti Sanmartín, pero non adoptou ningunha decisión respecto a súa participación no Goberno. Neste sentido, a organización delega a decisión na asemblea de adherentes da formación a celebrar na segunda feira. O caso Ourense A ausencia de maiorías absolutas no Concello e na Deputación de Ourense abre a porta a todo tipo de movementos. Así, na noite da terza feira, a Executiva provincial do PSdeG, liderada por Rafael Villarino, decidiu por unanimidade apoiar como alcalde da cidade Gonzalo Pérez Xácome a cambio de que este vote como novo presidente da Deputación o candidato do PSdeG. Precisamente, esta postura choca co defendido até agora polo alcaldábel socialista, Francisco Rodríguez, que fechou a porta a calquera pacto co líder de Democracia Ourensá, e pola dirección galega da formación. O PSOE de Ourense móstrase a favor de negociar con Xácome para apartar Baltar da Deputación As diverxencias dos socialistas ourensáns sobre a súa política de alianzas sitúanse dentro do conflito entre as diferentes correntes do partido. A este respecto, a alternativa de Villarino, integrado no sector crítico ao secretario xeral do PSdeG, Valentín González Formoso, foi rexeitada pola Executiva galega do partido, que sinalou que "non contempla negociar nada con Xácome", avanzou que "non descarta ningún tipo de escenario pero que tampouco vai entrar nunha poxa de institucións" e apostou por "valorar diferentes opcións, tanto para o Concello como para a Deputación, sen descartar ningunha combinación de acordo". As augas baixan, tamén, revoltas no interior do PP. Algunhas fontes apuntan a unha tentativa da dirección galega dos populares en apartar José Manuel Baltar da Presidencia da Deputación de Ourense, propondo no seu lugar o alcalde do Pereiro de Aguiar, Luis Menor. Porén, esta opción carece de apoio entre a militancia e os rexedores da circunscrición e xera temor no propio Alfonso Rueda, consciente de que unha fenda no PP ourensán deixaríao practicamente sen posibilidades de repetir na Xunta da Galiza. Pontevedra A reelección de Miguel Anxo Fernández Lores (BNG) como alcalde de Pontevedra está asegurada. Neste caso, o cabeza de lista dos socialistas, Iván Pontes, garantiu o seu apoio á investidura do candidato nacionalista. Porén, fica aínda moito para concretar os termos da súa relación futura. A este respecto, non está nada decidido sobre a participación do PSdeG no Executivo local, se ben as dúas partes lígana a un acordo programático e á coincidencia nos grandes temas da cidade. Lores non propón ningunha liña vermella para reeditar o Goberno local de Pontevedra Lugo As cousas semellan encarreiradas en Lugo. A experiencia destes catro anos de mandato e o mantemento da mesma correlación de forzas no Pleno da corporación, con 8 actas o PSdeG e 5 o BNG, favorecen un rápido acordo, que deberá concretarse nas próximas semanas. Na mesma liña, socialistas e nacionalistas apostan por dar continuidade ao proxecto de cidade comezado en 2019 e coinciden nos grandes temas pendentes. Precisamente, unhas das cuestión a referendo nas eleccións do 28-M foi o modelo de cidade, que a candidata popular Elena Candia impugnou durante a campaña. PSdeG e BNG resisten en Lugo o asalto de Candia A Deputación de Lugo A situación semella máis inestábel na Deputación de Lugo, onde un grupo de rexedores e concelleiros do PSdeG promove unha candidatura alternativa á do actual presidente da institución e dos socialistas lugueses, o alcalde de Monforte, José Tomé. A situación na Coruña Inés Rei revalidará como alcaldesa da Coruña. A candidata socialista contará co apoio do BNG, que duplicou a súa representación na cidade ao pasar de 2 a 4 actas. Porén, os tempos e temas da negociación son diferentes para unha e outra formación, actualmente centrados nun proceso interno de análise dos resultados e de concreción das súas propostas programáticas. Neste caso, uns e outros márcanse o pleno de constitución da corporación como data para fechar un acordo. O BNG pide certezas antes de optar por unha fórmula concreta de relación co PSdeG para o novo mandado. Nesta dirección, o voceiro municipal da formación nacionalista na cidade herculina, Francisco Jorquera, sitúa como cuestión previa a calquera outra a coincidencia sobre as prioridades da cidade e a garantía de que os aspectos recollidos no acordo programático vaian ser realmente executados. PSdeG e BNG, abertos a buscar "fórmulas" para garantir un Goberno "progresista" na Coruña As negociacións para gobernar as Deputacións fican para o final Os gobernos de 69 concellos galegos dependen dun acordo entre o PSdeG e o BNG. Neste sentido, 50 municipios contarían cun rexedor socialista no caso de ter o apoio da formación nacionalista. Así, entre estes atópanse cidades como Lugo e A Coruña, e importantes núcleos de poboación como Ames, Culleredo, Redondela ou Vilagarcía, cabeceiras de comarcas como Betanzos e Noia e un grupo importante de vilas medias como Mugardos ou Ares. O BNG conseguiu a maioría absoluta en 18 concellos pero podería sumar 19 Alcaldías máis co voto dos socialistas. Dúas delas serían as cidades de Compostela e Pontevedra, pero tamén localidades como Arzúa, Fene, Muros, Barreiros, Samos, Soutomaior, Barro e Cangas do Morrazo. De confirmarse, a formación nacionalista acumularía as cotas máis altas de poder local da súa historia. A este respecto, fontes do BNG sinalan a Nós Diario, que "o obxectivo pasa por conseguir os mellores Gobernos para a veciñanza e converter os concellos en auténticos muros de contención para a extrema dereita". Os Executivos das deputacións fican para o final do proceso. Os resultados nas circunscricións da Coruña e Lugo obrigan nacionalistas e socialistas a un proceso de negociación para evitar o Goberno dos populares, que continúan como primeira forza nesas institucións. Porén, non está nada falado ao respecto entre o BNG e o PSdeG, que se reunirán a finais desta semana ou a comezos da seguinte para enfocar o proceso.