120 propostas para pór o ramo ao Debate do Estado da Nación: dos 20.000 pisos públicos ás 2.000 prazas en residencias

"O Debate do Estado da Nación (DEN) bota hoxe o pano após dúas xornadas ben diferentes. A primeira, de focos e titulares, protagonizada polas intervencións, réplicas e contrarréplicas do presidente da Xunta da Galiza, a portavoz nacional do BNG e o voceiro do PSdeG na Cámara galega. A segunda xornada, ben diferente, de presentación por cada grupo parlamentario das súas 40 propostas de resolución, esas iniciativas que se votarán hoxe e nas que se plasman reclamacións, propostas ou demandas en diferentes ámbitos, desde a sanidade até a política internacional. Son propostas que reflicten tamén os diferentes proxectos para a Galiza que representan estes tres grupos parlamentarios. A primeira proposta de resolución do PP é unha defensa da "condición de libres e iguais" dos españois e da "soberanía" de España. A do BNG, pola súa parte, avoga polo "recoñecemento da Galiza como nación" e alargar o autogoberno. O PSdeG, na súa iniciativa número 1, pide "implementar un sistema de control de xestión" na Administración galega. Rueda converte o Debate do Estado da Nación no acto de saída da súa campaña electoral "A Galiza non para" Paula Prado, viceportavoz do PP no Parlamento, afirmou esta terza feira que as súas 40 propostas recollen boa parte dos anuncios feitos polo presidente galego, Alfonso Rueda, na primeira xornada do DEN; como o bono de 5.000 euros anuais para as persoas con dependencia grande ou severa que sexan coidadas nos seus domicilios por familiares. "Galiza non para", afirmou Prado. As 40 propostas inclúen unha condena "á pretensión de criminalizar sectores como o eólico". Non é a única condena que pide o PP. Na proposta nº40 reclama que se condene "o terrorismo e os discursos que o xustifican". "O que vemos en Israel non ten xustificación", dixo Prado, que eludiu, pola contra, mencionar os recentes bombardeos sobre Gaza. Tamén o PSdeG reclama unha condena da Cámara á acción de Hamas, ao tempo que pide que se manteña a axuda da UE a Palestina. Outra proposta do PP é que a Xunta preste "asesoramento, asistencia e apoio" ás vítimas "que viron como os seus agresores se beneficiaban da redución de penas" pola Lei do 'só si é si'. "Unha Galiza mellor" Luís Bará, viceportavoz do BNG na Cámara galega, presentou as 40 propostas de resolución como "alternativas para pór en marcha un país mellor". O nacionalista considera que no DEN da segunda feira "Rueda escribiu o epílogo do pasado e Ana Pontón o prólogo dunha nova Galiza". O BNG inclúe nas súas iniciativas a "reversión" dos servizos sanitarios privatizados e dedicar o 25% do gasto sanitario á Atención Primaria. Outra batería de iniciativas está enfocada a atallar o problema de acceso á vivenda, que piden enfrontar cun plan para alcanzar as 20.000 novas vivendas públicas en 2030 e facer que o Instituto Galego de Vivenda e Solo medie para que os propietarios de vivendas baleiras as poñan no mercado. Así foi o minuto a minuto do Debate do Estado da Nación Unha fiscalidade máis xusta —con retirada das bonificacións ao imposto ao Patrimonio, proposta que tamén fai o PSdeG—, restituír a coñecida como Tarxeta Básica e incrementar as pensións non contributivas tamén fan parte das propostas. Como o traspaso da AP-9 —que tamén figura nunha iniciativa do PP, mais non aparece entre as 40 defendidas polo PSdeG—. Como explicou Bará na súa comparecencia, o BNG expón tres axendas de accións para impulsar a ciencia, a innovación, a dixitalización e a aposta pola transformación ecolóxica e o clima, que, di, supoñen "un xiro de 180 graos ás políticas" que até o momento levou a cabo a Xunta. "Emenda á totalidade" Begoña Rodríguez Rumbo, viceportavoz do PSdeG no Hórreo, definiu as 40 propostas de resolución do seu grupo como "unha emenda á totalidade das políticas do PP nestes 14 anos". Advertiu de que a intervención de Rueda no DEN demostrou que, logo de 14 anos de Goberno, limitáronse a “xestionar sen máis ambición”, amosándose cada ano “incapaces de ofrecer solucións reais que resolvan os problemas actuais dos galegos”. As iniciativas, explicou, céntranse na reactivación económica e na defensa dos servizos públicos. A este respecto, Rumbo puxo o foco na "blindaxe das pensións públicas" para que, "independentemente do Goberno que haxa no Estado, se incrementen sempre en función do IPC". Entre as 40 propostas tamén se atopan medidas como a de crear 2.000 prazas nas residencias de maiores públicas. "Estamos convencidos de que son unhas propostas que inciden na mellora da vida das persoas", defendeu Rumbo. O PSdeG incorporou unha proposta de resolución para esixir á Xunta que cumpra coa Lei de Memoria Democrática e que organice cada 31 de outubro unha homenaxe ás vítimas da ditadura franquista. Os precedentes: un día de máis apisoadora que de acordos Os anteriores Debates do Estado da Nación (DEN) mostraron, cando chegou a quenda do debate e votación das propostas de resolución, unha aposta do Partido Popular máis proclive a activar a apisoadora que a tender a man. No anterior debate de política xeral, en 2021, o PP rexeitou 90% das propostas defendidas pola oposición. Só se aprobaron 48 das 120 propostas de resolución presentadas polos grupos políticos. A maioría das aceptadas, 40, foron do PP, que tan só permitiu que prosperasen 8 da oposición: 7 do PSdeG, cinco delas transaccionadas cos populares; e tan só unha do BNG, tamén tansaccionada co PP. E entre as iniciativas que saíron adiante naquel debate, a acordada entre populares e socialistas contra o dereito de autodeterminación. En debates anteriores tamén prevaleceu a apisoadora do PP. En 2017, por exemplo, a maioría do grupo popular na Cámara rexeitou todas as propostas de resolución presentadas pola oposición. Todas. Das 120 (do BNG, PSdeG e En Marea) non aceptou ningunha. No DEN de 2018 aprobáronse 54 dun total de 160 dos catro grupos con representación: todas as do Partido Popular (40) e unha quincena da oposición, na súa maioría as que levaban selo do PSdeG.