Unha nova perspectiva do piano

Que sería das nosas vidas se todo fose sempre igual, se non houbese mudanzas. Que sería de nós sen un pouco de experimentación... Iso mesmo debeu pensar Javier Otero Neira, compositor e pianista de formación clásica que nos últimos tempos comezou a experimentar co folk galego e que, no seu último traballo, Saraiba, se atreveu a probar coa electrónica. Saraiba / Javier Otero Neira / Autoprodución / 2022 / Sete pezas / En plataformas dixitais Otero Neira (A Estrada) defínese a si mesmo como "un artista polifacético e experimental". Este seu último traballo, que supón o noveno da súa carreira musical, non é o único en que experimentou coa electrónica. Xa no seu anterior disco, Reconstruction mesturaba os acordes do seu piano coa música electrónica. O achegamento da música sempre foi unha tónica xeral ao longo da súa carreira, e especialmente á mocidade. Así pois, para poder tamén darlles oportunidades aos novos talentos, Otero Neira decidiu crear o Festival Piano Meeting, con pianos na rúa. Trátase dun festival en que non só os profesionais poden participar, senón tamén os afeccionados ou xente que queira aprender. Ademais deste proxecto, crea e realiza por primeira vez no Estado español os Silent Wifi Music Experience (concertos ao ar libre nos cales o son chega ao público a través duns auriculares conectados mediante WIFI). O seu achegamento a outras músicas levouno a formar un dúo co pianista de jazz Abe Rábade. "Dúas visións para dous pianos", no cal ambos os pianistas exploran a improvisación a través de composicións clásicas e modernas. O primeiro videoclip deste traballo, e tamén unhas das cancións do mesmo, leva por nome Chamada á lúa. Este tema exemplifica á perfección a fusión entre piano e música electrónica, e nel pódese apreciar a destreza ao piano que o artista ten. Segundo Otero Neira, un momento que marcou moito a súa carreira foi a pandemia da Covid-19. "Foi unha época de depresión porque de súpeto vinme sen poder dar concertos, cun neno pequeno e coa miña muller que é enfermeira. Neses momentos sentía que precisaba unha vía de escape, e iso para min foi fecharme no estudo co ordenador e co piano e compor". El cre que a súa música reflexa aquilo que sentimos no momento en que é composta. Por iso, agora que se encontra nun momento bo da súa vida, sae á luz Saraiba que, segundo el, desprende mellores sensacións que as cancións que lanzou durante a crise sanitaria. Sexa como for, o que é innegábel é que Javier Otero Neira é un dos mellores pianistas con que contamos no país. A súa capacidade musical e a súa destreza coas teclas do piano convérteno nun esencial da música feita na Galiza. Que caia esa chuvia conxelada que chamamos saraiba, e que non nos falte a Saraiba, a de Otero Neira.