A beleza efémera do verán

Levaba algún tempo á espera dun disco que, por fin, acaba de estrearse. Non era eu a única. Varias voces chamaban por este novo traballo da banda de Noia, Momboi. Momboi constrúe para este Vacacións en Ornanda toda unha linguaxe cálida e evocadora para esa beleza efémera que ten o verán. Quen non pasou algunha vez pola fermosa praia de Ornanda, en Porto do Son? Vacacións en Ornanda / Momboi / 2022 / 13 pezas / En plataformas dixitais Neste longa duración, Momboi consolida o seu estilo de folk-rock moi pensado desde a onda latinoamericana. É quizais esa mistura tan ben levada, o que fai que este sexa un disco ben redondiño, cheo de texturas, cores e viaxes sonoras. Así, atopamos temas moi íntimos e próximos á tradición galega como "Teresiña", ou outros tan exóticos como "Hostal Azteca"; ambos os dous foran xa adiantos do disco no 2020. Destacan tamén "Cabalo negro" e "Cantos Abisais", xogo de ritmos, bailes lentos, misterio, certa escuridade nas letras e todo é branco. Pero sen dúbida son esas voces e eses coros mornos, eses retrousos ben axeitados, o que fai que non quites a orella deste Vacacións en Ornanda. Momboi conta nesta ocasión coa brillante deseñadora e ilustradora Agustina Shuan, que tamén fixo un traballo fermoso para a cantautora Astrogirl; se podedes botádelle un ollo a todo o seu mundo creativo. Unha última canción que vos quero recomendar deste disco é "Espellos Quebrados", un valse psicodélico, moi divertido, con aires "jazzy" que recorda a ese "My favourite things" de John Coltrane pero como se John viñese á Galiza nun verán pospandémico. E dun valse a outro, unha música que resoa en Bos Aires, onde tiven a sorte de estar case un mes escoitando novas tendencias. Alí e froito dunha casualidade total, estaba o gran Toquinho celebrando cincuenta anos do disco La Fusa, unha obra mestra gravada en directo que cambiou a historia da música iberoamericana. La Fusa son dous volumes, onde atopamos as voces formidables de María Creuza e María Betanha, a virtuosidade do guitarrista (daquela un rapaz descoñecido), Antonio Pecci Filho,"Toquinho" e o poeta Vinícius de Morais. La Fusa é unha historia de amor. Amor sen data de caducidade, amor á poesía e amor total ao feito de facer, gravar e producir música en directo. Naquel tempo, o gran poeta Vinícius de Moraes, autor da famosa "Garota de Ipanema", estaba exiliado na Arxentina e frecuentaba a noite porteña. Alí, coñece a outros grandes músicos como Astor Piazzolla e alí, no pequeno local musical La Fusa, nace a grande idea de musicar os seus poemas. Ademais de música, nesta fermosa viaxe de La Fusa hai vida e anécdotas fermosas que aínda manteñen a emoción intacta.