O Exército turco mata 260 integrantes do PKK no mes de decembro
Fontes oficiais aseguran que só no mes de decembro o Exército turco matou cando menos 260 militantes do Partido dos Traballadores do Kurdistán (PKK) no sueste do país.
Do total de falecidos, uns 200 integrantes do PKK serían asasinados na provincia de Sirnak e o resto, en Diyarbakir, ao sueste do país. Ademais, segundo o Exército, nas operacións que tiveron lugar en decembro incautáronse municións e destruíronse instalacións.
A ofensiva militar, que comezou hai quince días, contou coa participación de 10.000 soldados turcos e provocou que os territorios habitados na súa meirande parte por civís kurdos fosen abandonadas. Calcúlase que cando menos 200.000 residentes xa deixarían a zona pola crecente violencia. De feito, durante os enfrontamentos morreron uns 30 civís.
O presidente turco, Erdogan, sinalou que a ofensiva continuará até que acabe co PKK e cifrou en máis de 3.000 os membros desta organización que perderon a súa vida desde mediados de 2015 durante ataques aos territorios do leste de Turquía e do Iraq. Precisamente, a pasada cuarta feira, a forza aérea turca bombardeou territorio iraquí e violou o espazo aéreo do Iraq. Erdogan advertiu de que a decisión do despregamento de militantes neste país é irrevogábel polo momento. O Goberno iraquí dirixiuse ao Consello de Seguridade da ONU para que se pronuncie sobre o despregue de tropas turcas.